مدونة حكايات فريدة

جماعة " الاسلام هو الحل" مش هي الحل

ملحوظه
ما اكتبه في هذا البوست لا يعتمد على دراسه و ما هو إلى رأي شخصي جدا من واقع ما أراه في الحياه و قد يكون رأيي منقوص لأنه يعتمد على تجربه شخصيه لكنه رأيي المقتنعه به إلا أن يثبت لي العكس
..................
كلنا نعلم أن ما حدث من تزوير ضد الأخوان الانتخابات الماضيه و أن حقيقة شعبيتهم الكاسحه الصادمه للحكومه
هي السبب الرئيسي لكل ما يحدث الآن من الغاء إشراف القضاه على فرز الصناديق الانتخابيه و ما نمى إلى علمي من فرض حراسه على بعض رجال الاعمال الممولين للأخوان إلى آخره مما يحدث الآن في مصر
و الحكومه بهذا تزيد من شعبية الاخوان و تعاطف الناس معهم
و أنا رغم أني أشفق عليهم إلا إني لا أقتنع بأن الاخوان هم الحل
...
لقد عرفت في حياتي الشخصيه العديد من الأخوان المسلمين
و أنا أرى أن لهم فوائد في المجتمع
مثل الجمعيات الخيريه
و المدارس
و أي عمل يعملوه لصالح الجتمع بصراحه يجيدونه و يبذلوا فيه قصارى جهدهم
لكن مشكلتهم انهم مش بيعملوا ده لله في لله
هم ليهم أطماع ساسيه
.............
مش فاهمه ليه ميكونوش جماعه دينيه بس و خلاص
لأنهم بصراحه مينفعوش للحكم
ليه بقى؟
1
لأن الاخوان بيوصلوا لمرحله لاتطاق من عدم تقبل اللآخر
بمعنى إن كل شيء لازم يكون ديني
و بيوصلوا لمرحله مش بيقدروا يفهمو ا اي حد مش زيهم
و عمرك ما تعرف تتفاهم مع أي حد فيهم لأنه بيمسلك القرآن و السنه حجه عليك
و كل حاجه بقى حرام
ولو مكنتش معاهم فأنت ضدهم و ربنا يهديك
لازم تكون زيهم عشان تكون صح
و ده مش صح
يعني طبعا احنا لازم نصلي و نصوم و نزكي
ده شيء لا خلاف عليه
لكن للأسف هم كل حاجه لازم تكون عندهم مصطبغه بطابع ديني
الاغاني دينيه التلفزيون حرام \ اللبس ديني ...الذقن و النقاب ....الكتب اللي بيقروها دينيه

ممكن يدوك كتاب للداعيه الفلاني أو حن حاجه دينيه ...لكن كتاب في العلم أو بحث أجنبي نشر مؤخرا
مستحيل
طبعا صعب يسمعوا معاك اغاني لأنه حرام ...و الفيلم الاجنبي أو المصري حرام و المسرحيه؟ ..ربنا يهدينا
لازم شرايط دينيه و افلام دينيه و كتب دينيه
.....
أنا مش ضد الدين... لكن لما بقرا التاريخ بلاقي ان العصور اللي كانت فيها الامه الاسلاميه في عز إزدهارها... تلاقي حكايات عن اشهر العلماء و الأدباء و الشعراء.. الأندلس دي تحس لما تقرا عنها انها روضه من الجنه.. الجنه المتاع فيها مش دينيه على فكره.. المتاع فيها دنيويه برضه... يعني الصوت الحلو و الصوره الحلوه..و الكلمه الحلوه مش حرام...
و بعدين عقليتهم بتقف.. مش بيفهما يعني ايه فيه ناس بيكون صعب عليها تكون زيهم
............
الاخوان كويسين في انهم بيحفظوا القرآن .. ده شيء هايل... و انهم بيساعدوا المحتاجين .. انا لمست جهودهم عن قرب و مقتنعه بأنهم ممتازين في مساعدة البشر و ليهم تخطيط اداري أكتر من ممتاز... و الجمعيات.. و المدارس.. يعني مدرسة طيبه اللي في دمنهور دي أنا شفت الطلاب بيعيطوا في التلفزيون عشان الحكومه عاوزه تاخدها من الاخوان و كل التقارير افادت انها مدرسه هايله
كل ده جميل
بس ليه لازم يحكموا؟
ليه لازم يدخلوا الدين في السياسه... الخلافه الاسلاميه كانت قائمه على الدين ده صحيح .. لكن اقروا كتب التاريخ و انتوا تعرفوا ان مكنش كل هم الخليفه ان الستات متعملش حواجبها و سبل الترفيه الغير دينيه تتلغى .. لا... كان فيه شعرا و مطربين و علماء و مفكرين و حب و موسيقى .. كانت البلاد زي ورده مفتحه.. و كان فيه صلاه في الجامع و زكاه و تقى و الناس كانت عايشه في رخاء مادي
و اكيد كان فيه ناس تقيه و ناس عاصيه بس دول كانوا دايبين في بعض .. مكنش فيه مظاهر فاصله .. دول و دول عايشين في دوله حكامها مسلمين بيحترموا الشعائر الدينيه للديانات الاخرى و بيدوا الشعب حقوقه.. و بيبنوا جوامع و بيوت علم ..و بيحكموا بالشريعه ..ده صحيح .. بس كل الفئات موجوده و عايشه و حره و مفهومه و متقبله
مكنش الناس نصين ناس بذقون و جلاليب ونقاب و ناس بشعرها او بحجاب و حليقي الذقن
مكنش شعار الدوله الاسلام هو الحل زي ما يكون الناس بيتقسموا مسلمين و غير مسلمين.
.......
مش عارفه بس انا حاسه ان الدين أو الاسلام مش كده.. و انهم نجحوا في توصيل فكرة الاختلاف أكثر من انهم ينجحوا انهم يوصلوا الفكر الاسلامي للمختلفين عنهم
.....
انا شخصيا مش عاوزه الاخوان يحكموا لأن ساعتها حنتقسم اخوان و مش اخوان...رغم ان كلنا مسلمين و مسيحين مصريين
......
البوست ده مش ضد الاخوان كفكر انا مختلفه معاهم بس هم احرار.. و يعيشوا مختلفين وسط المجتمع براحتهم... بس يحكمونا ليه.؟.. يفرضوا علينا الدين بطريقتهم ليه؟.. انا مسلمه و بصلي و بقرا قرآن و تفسيره لكن بقرا كتب تانيه و بسمع الاجانب و بحترم حاجات كتير عندهم
و بطيع زرجي جدا و مؤمنه بولايته عليا لكني مش اخت و مش حكون اخت و حصاحب الاخت و كمان حصاحب اللي مش بتصلي و اللي بتغلط و المسيحيه و اللي ملهاش دين و بسمعهم كلهم و مش بفرض ديني لكني بحترمه جدا  د
..........
تحديث:وجدت هذا البوست الذي يعبر عما أوقول بل و بطريقه أفضل
عند جدو"وقع المحذور

16 comments

محمد عبد الغفار said...

المقال دسم جداً مش عاوز تعليق ده عاوز مقال تعليقا ًُعليه وخايف اعلق بأستفاضه اقوم ازعلك او لا يفهم القراء مقصدى لسوء تعبيرى أوغلظه الفاظى فسأكتفى بكلام مقتضب

الأسلام هو الحل اه ، انما الأخوان ليسو مطلق الحل فقط أفضل الحلول المتاحه الأن

Amira said...

عزيزي محمد

انت مش حتزعلني
وانا عارفه ان وجهة نظري الشخصيه دي فيها تجني

عشان كده كتبت الملحوظه اللي في الاول

بس بصراحه يا محمد انا متغاظه من الاخوان
لأنهم بدل ما يوصلوا الاسلام صح شوهوه

و الله انا اعرف ناس كتير عن قرب من الاخوان

أصدقاء و قرايب و ناس نسمع عنهم عن طريق ناس

و لما تلاقي انهم مش على الخلق المظبوط تلاقي ناس تقول لك ده عمل كذا و كذا و كذا في مراته
امال اخوان ايه و هباب ايه

أو تسمع عن ست طول النهار بره بيتها و الناس تقول لك جواز ايه ده ماتتكن في بيتها دعوة ايه و بتاع ايه

او تسمع ناس تشتكي لك من تشددهم و من نظرتهم للآخر بدون اي تفهم

الاخوان منفعوش الاسلام قد ما نفعوا نفسهم

أنا كنت مجحفه في العنوان الغضب أخذني
و غيرته عشان الاعتراف بالحق فضيله

انا عارفه ان الاخوان ليهم مميزات كتير لكنها ضايعه

اي إخوانجي هيقول لي انتي سايبه الجوهر و ماسكه في المظهر
احنا بنعمل خير كتير و لينا جهود لا تنسى

حقول له انتوا اللي مبينين المظهر اكتر من الجوهر

لو تفهموا الناس صح
لو تعبروا عن الاسلام صح
مكنش اختلط الحابل بالنابل و لا كان جرؤ الاعلام انه يصوركم ارهابيين و متشددين

مش عارفه يا محمد
بس انا شايفه انهم مش افضل الحلول المتاحه

Anonymous said...

الاسلام هو الحل رضيتي ام ابيتي والإسلام جاء لمناحي الحياة كليها واولها السياسة

Me2nour said...

العزيزة فريدة
أولا انا محرجة منك خالص
لسه مكتشفة البلوج الجديد دلوقتي
مع إني والله حاطة بلوجك القديم في الأكريجيتور بس للأسف موصلنيش تدويناتك الاخيرة فمعرفتش و إنشغالي في شوية حاجات منعني من الدخول على المدونة إعتمادا على البرنامج إنه بيبلغني بالجديد
ماعلينا مبروك و يا رب تكون قدم خير عليكي :)
بالنسبة لموضوع الإخوان
أنا بس عايزة أتأكد
هل تقصدي الإخوان أم الجماعات الإسلامية اللي بتتمسح فيهم
الإخوان بقى من وجهة نظري مجرد إسم قديم متمسكين بيه
لكن فعليا هما مبيعملوش بالدين الإسلامي و دخول الدين في كلامهم بيبقى للمصلحة
لكن الكلام اللي قلتيه ينطبق أكتر على الجماعات الإسلامية أو من يتبعون منهجهم و أسلوبهم و دول بيغلوا في الدين قوي ومالهمش في السياسة بس بيحشروا نفسهم فيها تحت جناح الإخوان المسلمين
للأسف إختلط الحابل بالنابل في النهاية و هتلاقيهم لا هم إخوان ولا حتى مجرد مسلمين

محمد عبد الغفار said...

فريدة

انا مش ههاجمك ولا شئ زى منت فاكره أنا فاهم كويس ان كل واحد له رأيه اللى حر فيه والغير ملزم للأخرين وانا كمان اللى هقوله رأى غير ملزم وممكن اكتشف بعد شويه انه غلط فى غلط

أنا بس كنت خايف ان الرأى المختلف وردى عليكى تفتكريه هجوم فتزعلى

وعلى فكره رغم انى مختلف معاكى فى الراى ففى مساحه اتفاق بنا فى النقطه المثاره ممكن تصل الى 25 او 30 فى المائة يعنى انا مش يمين وانت شمال لا بالعكس فى مساحه للأتفاق ممكن نطلق منها

الرد بتاعى بقى هعمله فى موضوع عندى عشان هيبقى طويل اوى على تعليق بس اعذرينى هتأخر شويه عشان انا مشغول موت فى الشغل وتوضيب شقة اكتوبر وافلام

Ahmed Salem said...

خليني اوضح لك حاجة مش عارف اذا كنت وخدة بالك منها ولا لاء

في اخوان و في سلفيين

معظم المواصفات اللي انتي اتكلمتي عليها متشابهة قوي مع السلفين و ليس الاخوان

و جهة نظري
الاخوان اكثر عمل ناحية المجتمع من السلفيين

الاخوان اقل في التشدد و العصبية من السلفيين

انا من اشد المعارضين للفكر السياسي بتاع الاخوان, لكن من اشد المؤيدين ان يكون ليهم حرية انشاء حزب سياسي مشروع (ده حق لاي مجموعة ليها حزمة من الافكار)

Hamed Ibrahim said...

أهلا بيكي فريدة

برغم كوني غير إخواني ..بس ليا علاقات إخوانية وطيدة تمتد من الصغر..

وصراحة دايما بنتقد رفعت السعيد لأنه بيتعامل مع أمور بشيء من السطحية والتعميم بصورة طفولية بعض الشيء .. لذلك تلاقي كتبه كلها مضحكة
لذلك ماكنتش عايز تقعي في بعض الأخطاء
فيه ناس كتير بتوجه انتقادات للإخوان بس بتكون موضوعية "وذات قيمة" .. زي ضياء رشوان .. هو مستقل
وممكن تلاقي حاجاته في معهد الأهرام للدراسات

دي كانت البداية وإن شاء الله هحاول أرد الرد التاني على كلامك

Hamed Ibrahim said...

بشكل مبدئي كلامك عن العمل الخيري والمدراس فعلا صحيح .. ولكن أنا باعتبر ده نصف الحقيقة

بداية
الإخوان مالهمش أطماع سياسية.. أنا بتكلم على الفرد العادي .. ممكن القيادات السياسة يكون ليها ..
بس تكوين الفرد الإخواني نفسه بأكد إنه ما بينشأش على ده
ولو اتكلمتي مع ناس كتير إخوان سواء كبار أو شباب.. هتلاقي تركيزهم ديني أكتر وإن الدولة فاسدة .. وعايزين نغير ده
(ده وجهة النظر الطبيعية السائدة)
لذلك بقول إن الإخوان بشكل عام غرضهم مش سلطوي.. وطبعا مش هتصدقي وليكي الحق

لذلك هاجيب الموضوع من ناحية تانية
حتى لو كان ليهم أغراض سياسية إيه المشكلة؟
أنا مش شايف أي مشكلة؟
الناس بقت بتنقل الموضوع ده وبتتداوله وكأنه عيب دون أي تفكير عن أبعاد الموضوع وأسبابه

يعني إيه المشكلة لما ألاقي بلدي مليانة فساد .. وأنا شايف (بغض النظر عن صحة الشوف) إني ممكن أصلح ؟
إيه المشكلة لما يكون ليا أغراض سياسة علشان أصلح؟
ثم حتى إيه المشكلة إن يكون ليا أغراض سياسة بشكل عام
ما كل الأحزاب ليها أغراض سياسة .. وإيه المشكلة لما كيون ليك غرض سياسي
ما انتا لو مالكش غرض سياسي يبقى نروح ونقعد في البيت ونلعب جيمز على الكمبيوتر !

لو المظاهرة مالهاش غرض سياسي يبقى ما نطلعش مظاهرات بقى!
وهكذا

تعرفي يبقى الكلام إزاي
لو كان الكلام إن للإخوان أغراض سياسة سيئة
من هنا نبدأ الكلام
مش نبدأ الكلام عن أغراض الإخوان السياسة !
===

بالنسبة لتقبل الآخر
مش عارف ليه حسيت فعلا إنك بتتكلمي عن الجماعات السلفية زي ما شفت رد هنا كده !
بصي باختصار شديد شوفي الإخوان بيقروا لمين .. تعرفي هما إيه
علشان ما نسهبش في كلام وردود طويلة
الإخوان مثلا بيقروا لسيد سابق فقه
وسيد سابق من أكتر الأشخاص عنده تنوع في الاختلافات الفقهية وده موجود في فقه السنة

القرضاوي مثلا.. متهيألي مش هاعلق على القرضاوي ووسطيته الرائعة
وأيضا الغزالي

بيقروا أيضا لمحمد عمارة.. ولو ما حدش قرا لمحمد عمارة يبقى على أي أساس يحكم على تقبل الآخر عند الإخوان
حتى كتب محمد عمارة اللي بيرد فيها على ناس بعينهم.. ناس المجتمع -للأسف كفرهم- شوفي إزاي دافع عن إسلامهم قبل ما يرد عليهم

وأمثلة كتيرة لكتاب رائعين

لذلك هاقولك مثل بسيط
يعرف الشخص مما يقرأه باستمرار !
====

طيب للأسف بقرأ كلام غير واقعي بالمرة
وأرجو منك يا فريدة تعيدي النظر فيه بأمانة الكاتب اللي أنا متأكد إنها عندك وإلا ماكنتش رديت وتعبت نفسي

التليفزيون حرام
اللبس الديني
الذقن والنقاب
الكتب اللي بيقروها دينية

طيب كل الكلام ده أعتبر للمرة التانية قصدك على السلفيين؟
ده حتى السلف دلوقتي كتير منهم ما بيقولوش ان التلفزيون حرام
وحتى فيه سلف بيقولوا ان النقاب فرض أه بس فيه أراء فقهية تانية عكس هذا.. لذلك ما بيقولوش على عدم النقاب حرام(بعض منهم فقط)

شوفي لأما أقولك السلف كده ما بالك الإخوان!
أعتقد المفروض أن يبقى الموضوع اسمه السلفية ليست الحل!
ما علينا


كنت بتكلم مع واحد يساري وهو شخصية محترمة جدا اسمه ممدوح درة
المهم بيقولي انتا توجهاتك إيه؟
بقوله أنا تفكيري فيه كتير من الإخوان بس مش إخواني

قالي إزاي واحد إخواني وبيسمع لوجيه عزيز ومارسيل خليفة

قلتله وإيه يعني؟
وفعلا مش عارف بعض الناس عندهم فكرة خاطئة ليه
لأن فعلا إيه يعني؟
هل حرام؟
أنا أعرف ناس إخوان وتفكيرهم إسلامي وتوجاهتهم إسلامية
ومع ذلك بيسمعوا أغاني محترمة وبيتفرجوا على التلفزيون المحترم منه
وبيقروا في مختلف المجالات مش دينية زي ما قلتي
أنا أعرف ناس إخوان مثلا عندهم مكتبات ضخمة.. وليهم اهتمامات أدبية زيي
وبيقروا أمل دنقل وصلاح وكله
إيه المشكلة لتاني مرة؟
تقريبا الناس واخدة انطباع غلط
بل فيه منهم بيحضروا معايا حفلات.. ومسرحيات هادفة

اختيار الشيء ونوعيته حق ليهم.. ما ممكن تلاقي واحد ملحد ما بيسمعش اغاني هابطة
إيه المشكلة؟

الاختلاف بس هايبقى في اسباب كل واحد.. وأكيد هيتلاقوا في أسباب معينة


====

طيب مسألة معاملة الزوجات
براحة أنا متعجب جدا
لانك دخلتي تقريبا على جماعة التبليغ والدعوة مش الإخوان !!
وفيه خلط واضح

أولا الإخوان تلاقي كلهم متعلمين ومثقفين
ودكاترة ومهندسين ومحاميين.. ومش بس كده
بل متفوقين في كده وتلاتقي دكاترة في الجامعة ومعيدين
وتلاقي معظمهم مثقف وبيلبس كويس مش زي ما بتقولي جلاليب وبس وحالتهم يرثى لها
وتلاقيهم متابعين الأخبار وبيدخلوا نت عادي-خصوصا الشباب- مش زي ما حضرتك كتبتي يعني
وممكن أديكي لنكات لمواقع شباب إخوانيين مثقفين جدا ومتابعين وواعيين ومتفتحين
ليه ننقل الصورة السيئة دون النظر للعديد من الصور الجميلة؟


أعرف بيوت كتير منهم بيحبوا زوجاتهم .. ومعاملة بينهم بشوفها بنفسي سامية جدا
زي أي حد يعني
وطبيعي إن كل جماعة أو مجموعة بشر يكون فيهم الكويس والوحش
أنا بتكلم عن المنظر العام

أما ولادهم بلبسوا نظيف ومتعلمين مش زي الصورة اللي حضرتك كتبتيها !
مش عارف صراحة انتي قاعدة فين
زي ما يكون حضرتك نقلتيلنا صورة من العصور البدائية



ملحوطة في الآخر
مسألة المدارس دي أنا لمستها
الأطفال والطلاب كانوا بيعيطوا ليه
لأنهم مآمنين بفكرة وحبوا ناس شافوهم مخلصين وارتبطوا بيهم بعلاقات إنسانية وتربوية ونفسية
لذلك كان صعبان عليهم ده كله
مش علشان أن الحكومة خدت حاجة منهم فمش هايبقى ليهم حق التملك

دي النظرة التحليلية الللي عايشتها فعلا بدل النظرة الخارجية غير الدقيقة


موضوعك يا فريدة برغم الاختلافات الكتيرة إلا أن لا أنكر إنه موضوع مطروح وأشكرك لطرحه
والاختلاف في الرأي لا يفسد للود قضية

إن شاء الله تكملةالموضوع هتلاقي ردودي

تحياتي ومعلهش أطلعت

Hamed Ibrahim said...
This comment has been removed by the author.
Hamed Ibrahim said...

خارج الموضوع بعض الشيء ولكن مهم
لو حضرتك ماعندكيش مانع أرشحلك بعض الكتب للقرضاوي ومحمد عمارة
علشان تفهمي إن دول واجهة مشرفة للإسلام مش زي ما حضرتك قلتي
سواء من فقه الاختلاف ولا الرؤية العامة للإسلام ..إلخ

Amira said...

me2

شكرا انك بتابعيني و بتدوري عليا
..........
بالنسبه لتعليقك
انا نفسي مش فاهمه و الظاهر اني فاهمه غلط
و فعلا اختلط الحابل بالنابل
و لازم اقرا زياده في الموضوع ده

Amira said...

تجربتي

شكرا جزيلا للتعليق

انا بتكلم عن الاخوان اللي اعرفهم

انا مؤيده ان يكون ليهم حزب طبعا .. دي حريتهم

لكن انا مش مقتنعه بيهم للحكم

Amira said...

حامد
اشكرك بشده
و انا رديت عليك في بوست كامل

بس و الله يا حامد الاخوان اللي اعرفهم كده

كل حاجه حرام
كل حاجه غلط
و مقابلتش ناس مهتديه و هاديه كده زي ما المفروض يكونوا

ممكن يكون الفكر بتاع كتابهم كويس

بس هل التطبيق زي الفكر؟

يعني ما احنا مسلمين عندنا احسن و اعظم كتاب
اللي هو القرآن لكن تطبيقنا مش بيدل عليه

فاهمني؟

و بعدين انت بتقول لي انا مش فاهم انتي قاعده فين؟

انا قاعده معاكم يا حامد
و انا ست بدخل بيوت الناس دي
و بشوف جايز اكتر منك شويه

انت قابلت نماذج كويسه
وا انا ما قابلتش
ده الاختلاف

انا مش بتكلم عن ناس في كوكب تاني
انا بتكلم عن اخوان عاديين
و اطباء و مهندسين
و دكاترة جامعه كمان

بس و لا شخصيه احترمتها
من بره
عشره على عشره
حافظين القرآن .. متفوقين علميا .. بيصلوا في المسجد و متبهدلين علشان الدعوه و بيصعبوا عليا فعلا

لكن لما تدخل حياتهم فعلا
تلاقي تعصب
بيوصلوا لمرحله و الله بيكون صعب عليهم يتفهموا الآخر ... بيكون احنا ناس و هما ناس تانيه

و اعرف طبعا ستات اكتر
كلهم متفوقين جدا علميا
بالمناسبه يا حامد
انا مش ست بيت
انا معايا شهاده كتير يتمنوها
محبش اقول انا بشتغل ايه عشان انا مش بكتب معلومات شخصيه عن نفسي
بس المهم يعني اني بعرف ناس من فئات المفروض انها كويسه

لكن فعلا الستات الناشطات في الدعوه مشغوله جدا
و زياده عن اللزوم
لدرجه بتلاقي معاها البيت مش اولويه

ده رأيي


و بعدين ملقيتش زوجين فيهم تقول هم دول اللي ماشيين على الاسلام صح

انت بتبص على مكتابتهم و شهادتهم و حوارتهم الراقيه معاك

انا بعرف داخليتهم
و مشاكلهم
و العصبيه و نسيان الدين

في النهايه و جهة نظري زي ما قلت في بداية البوست
منقوصه

لأني بحكم من منطلق شخصي بحت

اعذرني

و بشكرك مره تانيه

Amira said...

محمد

بعد ما تفضى من انشغالك
لازم تكتب لي على الميل

عشان فعلا انا عاوزه اكمل مقالات ضد التيار

و تكون كلام موضوعي مفيد مش مجرد سفسطه

و اكيد انت حتفيدني

شكرا

ebn elbalad said...

ببساطة الاخوان منظمين جدا لكن عيبهم انهم مش عنهم ليونة تناسب السياسة ولا عندهم برنامج سياسى واضح وانا مؤمن ان الحل شخص او كيان او مجموعة انتمائها مش لشخص او لفكرة او جماعة انتماؤهم اشئ واحد بس
مصر والصح يمشى
وكمان لو فية شفافية وعدل ما دا اسلام
ولو فيه نظافة يد وديمقراطيةما دا اسلام
لو فى احترام لحقوق الانسان وتداول سلطة مادا اسلام
وساعتها مش حيبقى فى اخوان مسلمين ولا شعار بيقول الاسلام هو الحل
حد فاهم حاجة
يا ريت

Anonymous said...

كل اللى عايز اقوله كل واحد يصلح زي ماهو عايز بس يتقى الله سيبوا الاخوان تصلح سيبو الاحزاب تصلح كل فرد فى المجتمع بتاعنا يصلح وبلاش بقا شغل العصبيات الفردية منين اختى تقولى انهم بيعملوا حاجات حلوة وبعدين بس غلط الله لايصلح العمل الفاسد وبعدين حكم البلد لكل الناس لكل واحد مش للاخوان ولا لحسنى مبارك ولا لحد اى يحد يترشح مش تيجي على الاخوان وتوقلي مايصلحوش على اي اساس انتى جربتى وفشلوا ماعندك الاخوان فى فلسطين محاصرين ومتبهدلين والدولة مافيش اي مشاكل ولو فتحوا الحصار هاتعرفي يعنى دولة مرجعيتها دين الاسلام شوفي المسيحين فى غزة بيقفوا مع حماس شوفي مراسلة البي بي سي تقول ان المؤسسات فى حكم حماس منظمة وشفافة رأيك يحترم اختى وجزاكى الله خيرا

Professional Blog Designs by pipdig