مدونة حكايات فريدة

انتي مرتاحه مع جسمك؟


البوست ده كلام ستات مع بعض
و هي فكره بتلح عليا من فتره اتكلم فيها
هو انتي مرتاحه مع جسمك؟
............
فبالعشرينات مثلا كانت البدانه هي مقياس الجمال
و بإمكانك ان تجد في الروايات تغزل في سمانة الست المدملكه او الذراعين المربربين و النهد المكتنز و العجيزه الممتلئه دون ترهل
و كانت كل نحيفه غاية أملها ان تبدن قليلا و مش شرط ان تكون بدينه
فبالنظر الى الصور القديمه للمرأه في هذا الوقت تجدها ليست مفرطة البدانه لكنها ليست
so slimmy
يعني بالبلدي مش معضمه و لا ناشفه كان لازم تكون امكانيات
في الخمسينات و مع موضة الفساتين الانثويه كان لازم الست تكون نحيلة الخصر و الشعر قصير و الجسم ملفوف برشاقه



في السنين اللي احنا فيها دلوقتي و لأسباب اعلاميه بحته صارت النحافه هي الموضه و الجمال وصار الزيادات غير مقبوله على الاطلاق
و بدأ تعب كل الستات.. فكلنا عارفين ان في عمليات تجميل للجسم دلوقتي..من غير رياضه و لامجهود ينحتوا جسمك زي التمثال
لكن الكلام ده متوافر لشريحه بسيطه من النساء .. الممثلات و الثريات جدا
و بفضل عمليات التجميل فجأه صارت كل النساء بنهود ممتلئه و مؤخرات محشوه سيلكون
رغم انها بالبلدي كده بتكون معرقبه و حجم الصدر و المؤخره لا يتفق و حجم الذراعين النحيفين جدا و الساقين اللي يدوب شايلين السيلكون ده.......و دلوقتي كل حاجه منزوعة الدسم أو دايت و دكاترة التخسيس مهمين جدا

و البنت المظبوطه مبتعجبش الشباب عاوزينها لعبه صغيره شبه نانسي عجرم

الاعلام بيلعب في دماغنا و يعمل لنا غسيل مخ و مش فاهمه مين بيقرر ايه هو الجمال

و ان كان ربنا خلقنا مختلفين و متنوعين ليه اصبح املنا ان نصير صوره ممسوخه مشوهه من كائن واحد

.................

اللي خلاني اكتب في الموضوع ده اني عشت عمر طويل نحيفه و مقاسي لا يتغير و لأول مره من وقت طويل جدا البس 44 بدل42 و حسيت اني زدت ...رغم اني مش زايده للدرجه دي

و بقى عندي هاجس اني حكون بدينه و حاسه اني كارهه اي حته زياده في جسمي
رغم انه طبيعي ان مقاسي يتغير لأني بكبر في السن و اللي مش طبيعي اني لسه بلبس حاجات عندي من اكتر من 10 سنين و لسه على مقاسي
لكن الهاجس استحوذ عليا.. وركزت مع نفسي لقيت اني بتعب جسمي و بحسسه اني مش مستريحه معاه و انه مضايقني.. و اني وقعت اسيرة الصوره الاعلاميه المتداوله دلوقتي و ان ده غلط و ان عادي اني اكبر في السن و يتغير شكلي و جسمي
و عادي اني اعجز من غير ما افكر اعمل بوتكس في وشي
و اني لازم احب جسمي زي ماهو و لازم احب التجاعيد اللي حتتكون في وشي و ان اهم حاجه السلام النفسي و اهم حاجه مسيبش نفسي للبدانه عشان صحتي لكن مش لازم اعذب نفسي لما اتغير
و ان جمالي ده مش دايم و الاعلام أو الميديا هي اللي بتحط حمل زياده على كل ست عاديه طبيعيه بتتخن و بعدين تخس و ترجع تتخن و بتعجز
و مش فاهمه برضه منين بيجيبوا الفكره؟؟؟؟؟؟.. يعني مين بيقرر موضة الجمال كل عقد؟ و لصالح مين؟؟














25 comments

Unknown said...

ايه الإحراج ده ؟؟؟
في وش المدفع كده ؟؟
طيّب
......
مساء الخير يا فريدة
احم
جيتي على الجرح وخصوصاً اليومين دول
أنا زايدة حوالي تلاتة كيلو وبقيت مش عايزة أخرج لأني مابحبش ألبس حاجات ضيقة
وبعدين لقيت الشعر الأبيض بيزيد وأنا مش من هواه الصبغة
بتفكريني ليه بس ؟؟
بصي أنا بحب شكلي وبحمد ربنا عليه لكن أنا مع ضرورة الاقتراب من الشكل المثالي
مش لازم نكون نسخ من حد معين لكن على الأقل يكون فيه شكل رياضي ويدل على الصحة وده معناه لا تخين ولا رفيع
لأ زي طبيعة جسمنا ماهي عايزة
بس مآجيش آكل شيكولاتة كل يوم وأقول دي طبيعة جسمي
وده اللي أنا عملته بالظبط الشهر الأخير
بس ها أخس ان شاء الله
بس على فكرة الجيل الجديد من البنات كلهم نونو زي نانسي فعلاً
ومهما يآكلو ما بيتخنوش
حاجة تغيظ
....
تحيات زيادة

Me2nour said...

إنتي زعلانة من زيادة مقاسك درجة واحدة.... طب تقولي إيه في واحدة بتتشكشك كل يوم ب 3 حقن هرمونات و بالتالي مقاسها زاد 3 درجات!!! صحيح المقاس 40 بس أنا فاهمة إحساسك جداااا
المسألة تعود مش مسألة رفع أو تخن
بس مؤخرا بيوت الأزياء بدأت تحارب النحافة المفرطة بسبب موت إحدى العارضات.... توقعي تغير المقاييس مرة تانية :)

محمد عبد الغفار said...

وهذا مثال اخر على احتلال العقيدة فى قلوبنا لمركز متاخر مع أحتلال قيم اخرى للصدارة ولا يثتثنى من ذلك سيدات او رجال

عندنا فى المصنع فتاه عامله فى وجهها الكثير من الجمال والحسن ولكنه مصابه بإعجواج فى العمود الفقرى فضلاً عن كونها حدباء (مثل احدب نوتردام كده)
فبله عليكى ماذا تفعل هذه الفتاه

محمد عبد الغفار said...

معلش نسيت اقول ان الصور غير موفقة

Ahmed Salem said...

على فكرة الموضوع مش حريمي قوي
في حتة رجالي شوية

النهاردة بقي الشب بيروح و بكل الطرق المشروعة و الغير مشروعة بيحاول يعمل صدر منحوت و ذراعين قويين

بيتهيقلي والله اعلم يا فريدة هانم انه تاثير سلبي من الميديا, كل اللي حوالينا بيخلينا عايزين نبقلى زي الناس ال"حلوة" اللي احنا بنشوفها ده

عاشان كدة هنلاقي ناس كتير هتزعل علشان مقاسها زاد من 42 الى 44

انا من اكثر النا ايمانا بانه لازم نحارب البدانة لانه الناس مش واخدة بالها انه البدانة مرض و بيجيب امراض تانية, يعني مش مجرد منظر وحش

عموما انا لازم اقول ان موضوع انك تكوني مرتاحة مع جسمك مهم علشان هو اكتر واحد بيكون معاكي في حياتك

islamventura said...

و الله اللى انت رصدتيه مهم جدا
بس انا عايز اقول لك اننا مجموعة كبيرة مختلفة جدا و كل بنى ادم اتخلق بزوق خاص بيه اذا كان شاب او بنت
فانتى عارفة باردوا معيار الوسامة فى فترة كان للشاب العضلات و ماشى يشيل و يهبد فى الناس و بعد كدة رجعت الامور تهدى و رجعت المعايير الى وضعها الطبيعى
هنا واحدة زى نانسى عجرم شوفى شكلها قبل و بعد و الالة الاعلامية اللى ماشية بطريقة اللى القريب من العين قريب من القلب لغيت ما غيرت
انا لى راى
فنانة زى زبيدة ثروت اجمل 1000 مرة من نانسى عجرم او هيفاء او.. او...و
راعى الاتى
نفس نوعية الجسم و اختلاف الزمن و مدى تدخل تكنولوجيا العصر و موضة العصر التى جعلت فى الخمسينات زبيدة ثروت ملكة جمال رغم اختلاف المعايير على حد قولك

نفسى تزورى المدونة عندى من فترة طويلة

chaos said...

http://chaosalways.blogspot.com/2007/03/to-tota.html
plz check it out

ody911 said...

أنا قلت بدام الموضوع بتاع ستات
وسبعات

فقلك امسى بس

مساء الخيير

وعادى بقة
اودى

ألطيبُ said...

فريدة
تحية طيبة وبعد
راقت لي كثيرا مدونتك هذه وقد زرتها عدة مرات لكن هذا هو تعليقي الاول ان كنت لا ازال اذكر جيدا
مما كنت قد تابعته مقالاتك على مسألة الشذوذ واتفقت معك في جل ما ادليت به في هذا الشأن حتى اني مؤخرا حاولت ان اكتب بهذا الخصوص واشرت الى ما قرأته لديك هنا
ولما كنت انوي ان اضع لائحة بالمدونات التي افضل ارجو ان اعلم ان كان لا يزعجك ان اضع اسم مدونتك بين ما افضله ؟
في الختام لك مني اطيب التحية
الطيب

smraa alnil said...

يا لهوووووووووووووووي
اروح فيكي فين يعني

بس تصدقي موضوع جديد وعمر ما حد اتكلم فيه
بس انتي زعلانة عشان مقاسك زاد
يا سيتي اتحركي شوية بس وهو هيرجع تاني زي الاول
اساليني انا
مرة في الطالع مرة في النازل
وخديها قاعدة بجد
مش في حد بيرضي عن نفسه
لا الرفيع فرحان انها رفيعه
ولا الطخينة عايزة تبقي طخينة وكله بيبص علي كله
وتحياتي للبوست الجامد دة بجد

Amira said...

أميره
مساء النور

و لا احراج و لاحاجه
دي فضفضة ستات
كلامك مظبوط بس انا مش بحب الرياضه و عنديش وقت ليها

أم الشيكولاته فأنا مستحيل أستغنى عنها
بطلت الأرز و المكرونه منذ سنوات كيلا اتوقف عن تناول قطعة شيكولاته يوميا

أنا مقتنعه ان الانسان ميزان نفسه
و لازم الواحد ياخد باله لكن ما يوصلش لدرجة الهوس

اليل الجديد احجامه غريبه فعلا انا لاحظت الموضوع ده فعلا
:)
...............

me 2
ربنا يكون في عون اي حد بياخد دوا بيغير شكله او بيأثر عليه

مش بس الهرمونات
كمان الكورتيزون
انا سبب زيادتي الاساسي علاجي بالكورتيزون

وشي اتنفخ فشر البوتكس
و كل ما كان حد يشوفني يقول لي ايه الجمال ده

محدش فاهم اللي فيها
ههههه
يلا الحمد لله

ربنا يعافي الجميع و هي فعلا مسألة تعود
و ياريت المقاييس تتغير شويه
تحياتي

Amira said...

محمد عبد الغفار
و عشان كده قلت ان اهم حاجه السلام النفسي و الذي لا يأتي سوى من الرضا و الرضا لا يأتي سوى من الايمان

و مش بس اللي عنده عيب خلقي
كمان اللي ربنا خلقه بنصيب بسيط من الجمال
يعمل ايه

انا هدفي من البوست انتقاد الميديا اللي بتعمل لنا هوس بشكل الست
و نحافتها


ليه الصور مش عاجباك!!!؟
دي طلعت عيني على ماظبطتها

Amira said...

تجربتي

احلى كلمه في تعليق قريتها قلتها

موضوع انك تكوني مرتاحة مع جسمك مهم علشان هو اكتر واحد بيكون معاكي في حياتك

بحييك على تفهم الفكره
و فعلا البدانه مرض يجب اجتنابه

.
.................

إسلام

انا كمان بحب الجمال الطبيعي اكتر
و بستمتع بمشاهدة فاتن حمامه و سعاد حسني و ناديه لطفي في شبابها
اكتر من رؤية الشفاه المنفوخه و الأنوف المصغره

تحياتي لك
و انا بزورك بس انت بقالك كتير مش بتكتب جديد

Amira said...

ody
يا راجل احنا ستات ديمقراطيات
علق برحتك
عادي بقى

.............

الطيب
يسعدني جدا تشريفك
و يسعدني اكثر تعليقك
و أن تنوه عني او تضيفني عندك شرف كبير بالنسبة لس حقا

فما أطيب للكاتب من قاريء مستديم
أشكرك جدا لكلماتك الجميله
و أتمنى ان أكون عند حسن ظنك دائما

تحياتي

.............

Amira said...

سمراء النيل
هههههههههه
روحي هنااااااك


حبه في الطالع و حبه في النازل؟؟
ليه يابنتي كده بس
ده يخسر في الهدوم و الله
شويه نوسع و شويه نضيق

يلا

مبسوطه ان الموضوع عجبك و انا ابتديت مشي يوميا من اسبوع فات

تحياتي

محمد عبد الغفار said...

ردك على موافق عليه ، وانا بردو كنت بنتقد الميديا واللى بيصدقوها فى تعليقى وبحط الصورة دى ادامهم يمكن حد يفوق

الصور مش عجبانى ليه !!!!! انت بتهرجى صح ؟ على العموم انا كنت اقصد اخر صورتين ، واظن كده عرفتى ليه

Anonymous said...

لولا اختلاف الأذواق
لبارت النهساء

هااهاهاهاها

Nice Post - Cheers!

Anonymous said...

لولا اختلاف الأذواق
لبارت النساء

هااهاهاهاها

Nice Post - Cheers!

أشرف حمدي said...

برافو
ده موضوع مهم جدا فعلا وأحييك علي اثارته
في اعلان طريف لشركة دوف تم عرض شعار مهم
لماذا اصبح مفهومنا عن الجمال مشوها ؟
الأهم من ذلك هو من الذي يحدد الجمال ويضع له مقاييس وعلي أي أساس ؟
قديما كان تشبيه المرأة الجميلة بزجاجة الكوكاكولا ذات الخصر النحيل والأرداف الممتلئة , من المدهش ان يتغير شكل زجاجة الكوكاكولا الآن لتصبح نحيفة ذات قوام فرنسي !
معلومة أخرى
عارضات الأزياء كان يتم اخيارهم بأجسام نحيفة وصدور وأرداف متواضعة للغاية وذلك لسبب واحد
هو ألا يجذب جسد العارضة الأنظار عن الفستان نفسه
فصارت نحافة العارضات هي الموضة ! ومقياس الجمال الوحيد !

هناك مخرطة طبية تدخل منها الفتاة لتخرج بشفاه ممتلئة وأنف أحمق ان كان لنا ان نصف الأنوف بالحمق وصدور منفوخة كالبالون , كل من يقمن بهذه العمليات التشويهية يخرجن بنفس الشكل
لدي عشرات الصور لعشرات الفتيات هن صورة طبق الأطل من نانسي عجرم

الإعلام يرسم صورة ما . يرسمها بالعمليات الجراحية أو ببرامج الفوتوشوب المهم ان هذه الصورة تصبح هي الجمال المثالي ومن تخرج عنه فهي امرأة قبيحة
ربما كان الهدف هو تلميع بعض النجمات
لا أدري

تحياتي

Amira said...

أشرف حمدي

أهلا بك
وحشتنا

كلامك صحيح تماما
و انا كمان مش فاهمه ليه فجأه بقت النحافه الشديده حاجه حلوه؟؟؟؟
و ليه
و عمليات التجميل أصبحت شيء مستفز و مبالغع فيه

ربنا يعينا احنا الستات على الميديا و اللي بتعمله فينا
:)

Ahmed said...

الغريب في الموضوع هو أنك ما زلت تلبسين ملابسك من عشر سنين
...
بلبس حاجات عندي من اكتر من 10 سنين و لسه على مقاسي
...
فعلا غريب
:)

Anonymous said...

هالووووو فريدة
أولا أحب أحييك على التدوينة الجامدة دى
و ثانيا على البوست الحلو ده
فعلا اللى بيحصل فى الميديا دة تهريج و بيكره البنات فى عيشيتهم و يمرد الأزواج على زوجاتهم
فاصبحت أجسام المغنيات و الممثلات و عارضات الأزياء هى المثال الأعلى للجمال مع ان الغلبية العظمى ان لم يكن جميعهم عبارة عن كتلة عمليات تجميل و شفط دهون والذى منه و برغم من الحقيقة دى نرى كل النساء و البنات يسعين وراء هذا الوهم ويصيبم الاحباط واهتزاز الثقة فى النفس اذا لم يبلفوه ونرى الرجل يضع هذه الشروط لفتاة احلامه فلا يجدها والزوج يتمرد على زوجته لأنهالا تواكب نانسى عجرم و غيرها
الجمال ليس له مقاييس واذا كان له مقاييس فليست اصطناعية و على رأي اعلان دوف لماذا أصبح مفهومنا عن الجمال مشوه

جسر الى الحياة said...

اه والله يا فريدة اجسامنا اشتكت من عقولنا المشكلة مش فينا يا حبيبتى المشكلة فى ازواجنا لانهم بيعلقوا بتلميحات تخليكى مش راضية عن شكلك وكان مفروض انك تقبلى انو بعد الجواز يبقى بكرش وميقبلش انك بعد ولادة الاطفال تزيد شوية كيلوات عايزة اقولك ان احيانا الجسم لا يستجيب لمحاولات التخسيس لانه بيحس بخجلنا منه فبيعاندنا وده والله عن تجربة هو بحث عن الشكل المثالىلكن يا ترى احنا من جوة مثاليين ولا بنحافظ ع الشكل بس يا ازواجنا المحترمين بصه واحدة لجوانا ربنا يهديكم وسيبكم من برانا لان عمر اللى فات ما هيرجع تانى على راى عبد المطلب

koukawy said...

من أي ان الموضوع نسبي
كل ست و شكلها بيفرق
فهو فعلا الصح ان تكوني انتي مرتاحه

Anonymous said...

http://www.youtube.com/watch?v=iYhCn0jf46U
خدي الموقع دا شوفته مره علي النت

عجبني قوي القي نظره جميل بجد عن الوضوع اللي بتتكلمي فيه

Professional Blog Designs by pipdig