مدونة حكايات فريدة

مصر فوق صفيح ساخن

من حوالي 10 أو 15 سنه كان من المستحيل ان حد يتكلم عن مقعد الرئاسه الدائم للرئيس مبارك
كلنا فاكرين أغاني اخترناك و بايعناك
كلنا فاكرين اول طلعه جويه فتحت باب الحريه
و معاهدات السلام و الجرايد اللي مش بتتكلم غير عن مبارك و التلفزيون المصري العقيم
...........
و فجأه دخلت أمريكا العراق .. جائت الى منطقة الشرق الأوسط و بقى فيه حريه و بقينا نقول لازم انتخابات لازم ديموقراطيه... و فجأه بقت الناس بتتكلم و بتشتم و بتعترض....و الحكومه سابتنا براحتنا نتكلم لكن بتغير الدستور على مزاجها هي
وده طبيعي و منطقي.. انا رأيي بدون يأس ولا تشاؤم .. ان الحال سيبقى كما هو عليه لفتره كمان وده لكذا سبب
أولا ان تغيير تاريخ الشعوب يقاس بالقرون لا بالسنوات .. احنا آخر ثوره عندنا بقالها نص قرن بس و دي سنين قليله قوي في عمر التاريخ
ثانيا ان حركة التذمر و الحريه المزعومه دي مبقالهاش كام سنه و لسه مجرد فضفضه .. جعجعه و كلام
ثالثا .. الشعب أو الفئه الغالبه منه .. الشعب المصري شعب داجن .. مسالم .. بيحتاج سنين طوييييييييييله عشان يتحرك
و حتى الثوره اللي فاتت مش ثوره شعبيه .. مش الشعب اللي اتحرك .. لا.. الظباط و هما اللي مغلبينا دلوقتي و ده طبيعي
رابعا.. اقروا كتب التاريخ كده وقولوا لي الشعب المصري بقاله كاااااااااااام سنه عمره مااختار الحاكم بتاعه سواء كان ملك او رئيس.. جايز الحاكم الوحيد اللي اخترناه فعلا كان محمد علي مؤسس النهضه الحديثه في مصر
خامسا ممكن حد يقول لي بموضوعيه لما نشيل مبارك و نرفض ابنه جمال حنعين مين رئيس؟ . الحاشيه كلها فاسده و ماأصخم من ستي الا سيدي....مين نعرفه و نثق فيه .. مين نحطه ونضمن ان كرسي الحكم مش حيغريه.. بذمتكم مين يحكم بلد زي مصر و شعب مسالم زيها ياخد على قفاه وهو ساكت و يعوز يسيب الحكم و يمشي؟
سادسا مصر لسه متخبطه .. لا فيه احزاب والفساد منتشر للجذور و الجهل و الفقر شاغلنا
..................
طيب نعمل ايه؟؟؟ نسكت؟؟ .. لا طبعا احنا زهقنا و الفقر بهدلنا خالص و الأوضاع بقت غير محتمله
نعمل ايه؟؟
بصوا يا جماعه تخيلوا جيشين بيحاربوا بعض و الجيش الاولاني متخلخل و ضعيف و الجيش التاني منظم وقوي
احنا بقى بحماستنا و اندفاعنا فاكرين ان لما الجيش الأول يصيب رئيس الجيش التاني حينتصر
لأطبعا
لأن بقية التنظيم بتاع الجيش الثاني قويه و الجيش التاني ضعيف و متنيل على عينه معندوش لا تنظيم ولاقائد
.................
هو الحال دلوقتي بقى عامل كده ... فجأه بعد ما كنا مش بنتكلم خالص .. و كله تمام يا ريس.. بقينا فاكرين الحكومه عدونا اللدود .. و كأن الشعب حاجه و الحكومه حاجه تانيه .. الاتنين أعداء و كل هم بعض الناس انهم يوقعوا الريس فاكرين بكده الحال حينصلح
التخطيط ده كله بقى في رأيي أمريكاني و بدون نظرية مؤامره ولا بتاع
ليه فجأه كده الامور في مصر بقت بالبشاعه دي .. حتقول لي الناس زهقت حقول لك طول عمرهم كفرانين .. حتقول لي الاعلام اخذ دوره حقول لك لوعاوزين يخرسوه قادرين
.......................
التنظيم ياجماعه ثم التنظيم ثم التنظيم
ترتيب الاولويات
اللي لازم الشعب المصري كله يعمل عليه مش ان جمال ييجي أو مايجيش لأنه جاي جاي
لأ .. اننا نقصر فترات الرئاسه.. اننا نطالب بمستوى معيشي احسن.. اننا لما نعرف أي فساد تقوم ثورتنا ولا تقعدش لغاية ما المسئولين يتعاملوا معاه
لكن احنا كده عاملين زي اللي بيرقصوا على السلم
مصر فيها دلوقتي من كل فيلم أغنيه.... كل الملفات اتفتحت مره واحده و الكل غضبان و هايج و الكل بيتكلم وينتقد خلاص
فجأه كده في حوالي أربع سنين فجأه كل حاجه اتفتحت ولا حاجه بتتقفل
في المطبخ السياسي للحكومه هما مش فارق معاهم اللخبطه دي ... احنا عاملين زي جماعه هايجين بنخبط في بعض عشان نوصل لهم ولا بنوصلش و هم عارفين اننا مش حنوصل... هم بقى شغالين بنظام وأولويات و بهدوء
........
مش مهم تقوم مظاهره عشان جمال مايمسكش لأنه حيمسك
المهم لو حصل اعتصام عشان غلاء الأسعار او عشان الفقر او عشان البطاله
لكن ده ما بيحصلش
......
انا ضيف تقيل على قلبك بس قاعد غصب عنك و انت كل يوم بتشتمني.. مش مشكله .. المشكله انك متأكلنيش او تاخد مني غطايا و تمنع عني شربي... ساعتها اقلق منك و التفت لك و اعمل حسابك
..............
لو حد فيكم شاف عماد اديب الاسبوع ده في برنامج العاشره مساءا كان فهم الطبقه العليا من المجتمع بتفكر ازاي
..
هو في وسط كلامه قال لو كل مواطن بعت تلغراف على مقر الرئاسه تلغراف حيكلفك جوز جنيهات تعترض فيه...لو الرئيس وصله مليون تلغراف أكيد حيلتفت
...
فكره ذكيه فعلا.. بس كام واحد فينا ممكن يعملها؟ .. كلنا خايفين .. معظمنا خايف من السجن و البهدله
.....
انا مثلا ست متجوزه و مستوايا المعيشي كويس.. لغاية اللحظه اللي بكتب لكم فيها مبارك ونظامه لم يضرني في شيء.. آه عايشه غلا حيجنني و آه بفكر يا ترى الناس اللي اقل مننا عايشين ازاي؟.. لكن عايشه و راضيه و الحمدلله
في غيري زيي كتيييييييييير كده ... بيقروا الصحف و يتضايقوا من الفساد بس عايشين كويس و مش متضايقين من النظام للدرجه اللي تخليهم يطلعوا مظاهرات
اللي عنده بيت بيخاف من البهدله .. اللي عنده ابن بيخاف عليه
ده الواقع
انا مش بدعو للسلبيه لكني باتكلم بمنطقيه وواقعيه
الناس كلها مش راضيه و في أوضاع غلط بس مش عارفيين نمشي ورا مين
يعني مثلا في ناس مش مقتنعه بالأخوان و في ناس مش مشكلتها ان مبارك يكون هو الرئيس .. لأ .. مشكلتها انها مش لاقيه تاكل..و هما مايعرفوش حد غير مبارك يعينوه و يثقوا فيه فسايبين الحياة تمشي و اهي ماشيه
مثلا موضوع حوادث القطار اللي ورا بعض
الكلام ده في اي بلد متقدم ممكن يسبب استقالة الوزاره.. لكن ده محصلش
لأننا مش ايد واحده و لا لينا حد نمشي وراه
انا شايفه ان نجاحنا اننا نعترض على حاجه زي كده اهم لأن الامور بتمشي واحده واحده
غلاء الأسعار اللي مضايقنا كلنا.. انا لو لقيت راجل واحد فيكي يا مصر قال بكره كلنا حنعتصم اعتصام سلمي في المكان الفلاني عشان الحكومه تسيطر على الغلاء ده حاعتصم مع الناس
لكن مفيش فايده
الاسعار بتزيد زياده و الجرايد بتتكلم و البرامج بتنتقد و الناس مش طايقه روحها بس مافيش حركه
اذا كنت انا يا مواطن مش باخد ابسط حقوقي و هي خير بلدي
اذا كانت المرتبات مهزله بكل المقاييس
و برضه مفيش حد بيعمل موقف..
......
انا وزيي كتيير ممكن نكون فعالين جدا لو فيه خطوات منظمه نمشي وراها ولو لقينا ناس كتير بتتحرك معانا .. ساعتها مش حنخاف حنقول ان كلنا ايد واحده
زي كده ثورة 19 كان مستحيل يقبضوا على الشعب كله
انا رأيي ان المشكله في التنظيم... ورأيي اننا المفروض نركز على مطالبنا كشعب ... المفروض ناخد خير بلدنا صح
المفروض يكون في حركة اصلاح شعبيه
نصلح نفسنا الأول ننظم صفوفنا و بعدين نفكر نعمل ايه
الناس السلبيه اكتر من الايجابيه
لأن مفيش ضمير الشعب بيسرق بعضه قبل ما الحكومه تسرقه
احنا بنوسخ بلدنا وبنسوء صورتها و مش بنشتغل بذمه كل ده فينا احنا
احنا بنتكلم كتير و بننتقد كتير لكن مش بنصلح نفسنا
ان الله لا يغير ما بقوم حتى يغيروا ما بأبنفسهم

16 comments

عبدالله said...

مقال جميل قوي فعلا عن البلد
بيحلل موضوع السلبيه و بيكلم عن الناس ازاي عايشه وبتفكر و محتاجه ايه
بس يا تري مين الي هينظم حاجه مين الي هيتحرك
انا كنت شايف ان الاخوان بما يمتلكوه من قدرات تنظيميه و افراد و وصول اعلامي قوي يقدروا يحركوا الشعب بس الغريب انهم حتي بعد ما اضربوا علي قفاهم و خدوا فلوسوهم و ناسهم الكبيره و لا اكنهم موجودين عادي خالص واهه كمان الدستور اتغير و مش هيقدروا يلمسوا مجلس الشعب تاني و برضه ولا هما هنا مش عارف ليه شكلهم اتعدوا من الشعب و بقوا سلبين

ياتري بقي الشعب هيفضل سلبي لامتي و ياتري لو انفجر هيبقي انفجار عنيف ولا لا
وياتري اصلا الشعب ممكن يتحرك
بدات اشك

تحياتي

Anonymous said...

أولا يافريده انا زعلت ان اسمك ماطلعش فريده
أصل فريده ده اسم حلو
وفريد
:)
انما مش مهم
كونك بتحبى اسم فريده ده كويس
المهم بقى
الجد

أنتى نرفزتينى قوى لما قلتى عماد اديب قال على تلميح كده
أولا هو ده انتى بتعتبريه من عامة الشعب ؟
مش ده اللى راح قابل الريس وقاله المواطن مش لاقى شوز
ويقصد جزمه

ياستى علشان خاطرى بلاش تسمعى كلام الناس دى
دول الناس المبسوطه من بقاء الحال كما هو عليه
ده رأيى يعنى والله أعلم

انما لعلم حضرتك الريس بتتعرض عليه تقارير بكل صغيره وكبيره فى البلد
ومن ضمن التقارير دى تقارير المخابرات وأمن الدولة

ده يعنى اذا عايزه تبررى انه مش عارف
انما هو عارف جدا
طيب بلاش تقارير الأجهزه دى يمكن فعلا بتكذب
مش باين انى فى معاناه ظاهرى فى وش الشعب ؟
أكيد بيتفرج على تلفزيون يعنى

بلاش التلفزيون, الاعلام كمان كداب - بس يمكن ده حقيقى فعلا

خلينا فى الارقام العالمية بتاعت الأمم المتحده عن معدلات النمو الحقيقية مش المضروبة اللى بتديها عن مصر
ولا تقارير الشفافيه والمصداقية

يعنى ياترى معدل النمو فى مصر ده حقيقى ؟
مش انا كرئيس أتكسف لما يكون معدل نمو السودان أكتر منى ؟
انا مش مصدق بس لما شفت تقرير الأمم المتحده ومعلومات المخابرات الامريكية اللى ناشراها على النت
معدل نمو السودان 8 % يعنى أكتر مننا

اذا مش مشغول بكل ده أمال بيعمل ايه يافريده؟
;)
انا بقى الصراحه مش شايف ان فى أى لازمه للمظاهرات
جعجه على الفاضى وخلاص
ومن مصلحة الحكومه انها تسمح بمظاهرات
هاتقول يلا خالى كل اللى عايز يقول حاجه يقولها لحد مايتعبوا

بس انتى معاكى حق فى حاجه واحده
احنا اللى نستاهل

وأخر جملة قلتيها مضبوطه تماما

ودمتى بكل خير
سلام

Dr. Tantawy said...

ايه يا عم ده .. دخلنا في السياسه .. ربنا يستر عليكي

كلامك حلو .. خصوصا حته النظام دي

بس موضوع عمرواديب و التلغرافات دي اي كلام :) لأنها مش هتوصل من اساسه .. ده اذا طلعتي من مكتب البريد على رجلك بعد ما بعتي تلغراف للريس ههههه

والله الواحد متفاءل .. بس

ولا بلاش .. لحسن يقولو عليه دكتور احباط .. خلينا متفاءلين .. احنا زي الفل و هنتغير و هنبقى احسن نااااس

زحل الفلكي said...

مقال بيوجع
اوي
:(

محمد عبد الغفار said...

الحكومه عاوزه الحرق والحاكم وحاشيته يضرون ل البلجد بكل طوائفها حتى المستفيد من الأوضاع مضرور بشل او بأخر

انما كله بيحاول ينسى ان كيفما تكونوا يولى عليكم
وما نقص قوم المكيال والميزان الا اخذوا بالسنين وشده المؤن وجور السلطان

محدش عاوز يفهم كده محدش عاوز يجاهد الجهاد الأكبر كله بيستسهل الجهاد
الأصغر ويقلك اهو نبقى عملنا اى حاجه

احنا اللى وحشين فى قلب بعض

harmless said...

هل يمكن ان ترى صورة كبيره بوضوح وعينك ملتصقه بها
لابد ان ترجعى خطوة للوراء او خطوتين او اكثر حتى تريها جيدا

ايضا لن تستطيعى الحكم على اى موضوع الا لو كنتى محايده
او على الاقل تجبرى نفسك على الحياد

الموضوع متشابك الاطراف وكل المتحدثين دائما ينظرون من زاويه واحده وهناك دائما اخطاء (تاريخيه) فى الحكم على المواضيع اخطاء قد يكون مصدرها النسق الادراكى للانسان كتركيبه انسانيه ووليس فقط لثقافته وايدلوجيته وهوى نفسه

كنت اتمنى ان ارد على نقاط كثيره فى كلامك فقد جمع رايك من اليمين والشمال بشكل مدهش
من التحليل التاريخى للاحداث الى نظرية المؤامره الى نظريات الحكم الى اسباب حركات الشعوب الى التفكير الرومانسى الذى نقوله الف عام ولا يتأثر الواقع به ابدا

ولكن اكثر ما اسعدنى فهمك للاحداث من المنظور التاريخى
والحقيقه ان هذه هى النظرة الثاقبه ولذا ساكتفى بذكر ملمح مدهش قد لايلفت نظر الكثيرين

كنت اقرا تاريخ مصر فى فترة مصطفى كامل وخطبه ومقالاته ابان حادث دنشواى وكنت كانى اعيش هذه الفتره واشعر بمشاعر ناسها ويفور فى صدرى امال معاصريها واحلامهم واتخيلهم عندما قررت حكومه بريطانيا عزل كرومر نتيجه لهياج الشعب

فى احدى الخطب قال مصطفى كامل ان الاحتلاال الانجليزى جاء مصر بدعوى انه سيستمر بضع شهور وله الان خمسة عشر عاما ومازال موجودا

ياربىىىىىىىىى
الاحتلال استمر ثلاث وسبعون عاما وهو يتكلم بعد خمسة عشر عاما
هل كان يتخيل او يتخيل اى مصرى او يتصور اى ثائر او يظن اى متشائم ان الاحتلال سيستمر اكثر من نص قرن بعد كل هذه الثورة وبعد كل هذاالتراجع من الانجليز

انتهى مصطفى كامل وانتهى عصره وراح ناسه وتغير الحكام والمحكومين وانتهى الاحتلال اخيرا بدون اى تاثير لهذا العصر ولا لهذا المناضل فى انهاءه

الاحتلال والجلاء كانوا احداث تاريخيه مرتبطه بمئات العوامل والظروف ولم يقع هذا ولم يحدث ذاك الا للظرف التاريخى فقط

والان لم يعد لنا الا ان نفهم الواقع ونحاول ان ندرك مسبقا

فى اى لحظه تاريخيه نحن واقفون

bentfalestine said...

تحياتي خيتي , و مين في البلاد العربية اختار نظام حكمه و مين مش متضايق من الفساد و الواسطه و ............. الخ من المصائب الي عايشين فيها . مقالك و كلماتك مؤثرة و مؤلمه درجة الاستفزاز الايجابي طبعا..
عذرا ع تطفلي و الاطاله تحياتي القلبية

يا مراكبي said...

إنت جيبتي المفيد: إحنا نستحق اللي بيحصل لنا

أنا غير مستعد إني أخاطر بأي شيء أملكه علشان في الآخر الشعب السلبي يسيبني أتبهدل لوحدي ويقولوا كويس لإني ما كنتش معاه

أنا بجد شايف العيب في شعبنا .. أصبح مغرق في الأنانية والسلبية لدرجة تخللي واحد زيي يستخسر إنه يبذل مجهود علشانه

أنا اللي خلاني أسيب مصر أو إني ما أحبش أنزل مصر هو السلوك المتدهور للشعب .. في سواقة العربيات وتحت البيت في الشارع وفي المصالح الحكومية ... كله ماشي بمدأ .. أنا ومن بعدي الطوفان .. والباقيين يولوعوا بجاز

تاني

إن الله لا يغير ما بقوم حتى يغيروا ما بأنفسهم

أول مرة said...

حكاية التنظيم اللي بتتكلمي عنها في مقالك " متنفعش " مش علشان الفكرة في حد ذاتها لا بالعكس لأن مفيش حد هيسيبك تنظمي حاجة
- تخيلي شخص ما في جامعة طرح فكرة زي فكرتك لو فرضنا جدلاً أنه قدر يوصل بيته هل تتوقعي أنه يطلع عليه صبح ؟؟؟؟
و تخيلي أنه ممكن من خلال كام قلم علي قفاه و عصاية مقشة ..... هيخرج يهتف لحسني و جمال و علاء و ماما سوزان و طنط نظيفه و لجنة السياسات و الحزب الوطنى .... و مش بعيد يهتف لحزب " كاديما إسرائيل " ( دا إزا خرج يعني )
- أما بالنسبة للإخوان دول موجودين قبل هذا العهد و مرتبين نفسهم لأنهم عرفين اللي ممكن يحصل في أي لحظة اللي يروح لازم حد يجي مكانه .
لأن النظام من وقت ما جه أخذ علي عاتقه القضاء علي التنظيمات الموجودة أو و جعل أدوارها هامشيه ...... بصي علي أي تنظيم جديد سواء كان حزب أو حركة جديد أو قديم حاول يعمل حاجة ايه اللي حاصل .....
حصل و طحينه

Anonymous said...

Shofty ba2a ya Ferry - el sha3b Bey7ashesh leih?

Khaly el Sha3b ye3eesh...

мїяάЖάгїм ™ said...

Dear Farida,

Yuor blog is awesome, begad

This is simply an invitation to visit my blog & read the translation of the rapport issued by the Italian National Institute about the violence on women in Italy, 2006.

http://chiccopolis.blogspot.com/

Really interesting

Karim

..........tahayo2at said...

السلام عليكم

الموضوع دا جميل بس ببساطة فين القوة الشعبية اللي تعمل كل ده

من الاخر الشعب المصري بقى مخصي سياسيا
وخلاص
دا اللي هما عملوه في السنين اللي فاتت

أول مرة اشوف شعب يرجع للخلف

أيام السادات كان الفلاحين مثقفين عن كدة

Anonymous said...

السلام عليكم

خير ؟
بقالك فتره مختفيه

أوعى تكونى دوبتى من حراره الصفيح الساخن
:)))))

لا بجد أتمنى يكون المانع خير
ودمتى بخير
سلام

Amira said...

أولا

أشكركم جميعا لمشاركتي بالتعليق

ثانيا أعتذر لأني لن أستطيع إفراد رد مخصص لكل منكم كعادتي
.

انشغلت الفتره الماضيه جدا
و للأسف حتى الآن وقتي لا يسمح بالكتابه

أشكركم جميعا و اعذروني

تحياتي

Hamza matar said...

lovely page, am inviting you to visit mine,,,,
hope to c u at my page


only for her eyes

Anonymous said...

Dear Farida

I think u have to go there
bokra-a7la.blogspot.com

Professional Blog Designs by pipdig