مدونة حكايات فريدة

كذبة ابريل




في كل عام و نحن صغار
كنا نتفنن في اختلاق كذبة ابريل
كنوع من انواع المزاح
.....

بالصدفه اكتشفت ما يروج عن اعتصام يوم 6 ابريل
هل هذا حقيقي؟؟
و من اين نشأت الفكره؟؟
الفكره خياليه و صعبه جدا في التحقيق
هي فكره ذكيه لتعبير الناس عن أنفسهم
لأنه الناس مش حتنزل الشوارع و تتبهدل
حتقعد في بيوتها و تعطل كل المصالح
ولو 97% قاعدين
صعب ال97% يتعاقبوا
لكن ده شيء شبه مستحيل يحصل
و في نفس الوقت الفكره خطيره و هدامه
و مفيش حكومه في العالم تسكت على حركه زي دي
لأن بها إضرار بمصالح الوطن
.....

لفهم الموضوع اكتر

اقرأ الروابط التاليه


.................

اعتقد ان دي هي كذبة ابريل هذا العام

الكذبه مش الدعوه للإعتصام.

الكذبه ان الناس حتعتصم فعلا
..

بس مجرد تخيل تحقق هذا الأمر تجعل خيالي يجمح
تخيلوا معي كده
و ربما لأول مره في التاريخ

شعب بأكمله معتصم في بيوته اعلانا منه أنه مقهور و عاجز مع الحكومه

تنفع فيلم

طب ما هي اتعملت فيلم فعلا

فيلم لمديحه كامل " مش فاكره اسمه"عن حقوق الست تخيل فيه المخرج لو اعتصمت النساء عن الذهاب للعمل اثباتا لأهميتها المتساويه مع اهمية الرجل

و صور المصالح و المطارات فارغه
..


تخيلوا معي مصر و شوارعها فاضيه و المكاتب فاضيه و الناس قاعده في بيوتها من العجز
من القهر و الفقر و الأوضاع المترديه

مشهد خيالي
لو تحقق لصار تاريخا تتحاكاه الأجيال

و لو لم يتحقق
سيظل كذبة ابريل 2008

7 comments

Anonymous said...

انا كمان يافريدة مش متصورة امكانية تنفيذ هذا الاعتصام وبعدين ما مدى جدواه هل هو فقط للتعبير عن الغضب والقهر ما احتا بنبعبر وايه النتيجه هو الناس اللى بيدعو للاعتصام ده عندهم تصور لما يمكن ان ينتج عنه ولا هو حركات وخلاصحد يفهمنى

محمد عبد الغفار said...

الفيلم كان اسمه الأتحاد النسائى وكان يمثل دور زوج مديحه كامل الراحل نور الدمرداش وهذا الفلم كان من انتاج التلفزيون عندما كان ينتج مجمعه من الأفلام سنوياً للعرض فى رمضان

اما الأضراب فده كلام زى اللى بصحيح يعنى ان كل حاجه عندنا شبه كل حاجه عند الناس الى بره شبه فقط بدون اصل او فصل او مبدا سليم او حتى تنفيذ جيد

للمره الألف احنا مشكلتنا الرئيسية مش الحكومة مشكلتنا الرئيسية الشعب الذى لا يعمل ولا ينتج وعاوز ماما تحطله الأكل فى بقه دون مبرر مفهوم لذلك

ادينى كتبت جرنال اهه

Ehab said...

مثلك انا تماما يا فريده
اول ما قرأت هذا الموضوع عند ابي

حسبتها بتهزر بجد
وكنت بحسبها يعني بتقول حاجه خياليه يعني
وبعدين لقيت ناس كتير بتتكلم في الموضوع بس المشكله ان مش كل الناس عرفت بالكلام ده في ناس كتير متعرفش حاجه عنه طبعا

المشكله بقى ان استحاله يحصل كده عارفه ان الناس اصلا هتموت من الفقر يبقى معندهمش استعداد يخسروا يوم من مرتباتهم علشان الحكومه تحس
صدقيني لو حتى ده حصل
اوعدك انه هيبقى تاريخ يحكى فعلا بس مش علشان موقف الشعب لا علشان رد فعل الحكومه

وانا وانتي انشاء الله قاعدين وهنشوف لو حتى ده حصل رد فعلا الحكومه هيبقى ايه
سلاااااااااااااااااااام

الطائر الحزين said...

توقعت أن هناك من سيكتب عن كذبة أبريل


لكن اتخيل أن هذا الاعتصام وان كانت فكرتة جيدة لكنه سيضر بالمصلحه


الله المستعان

كلبوزة لكن سمباتيك said...

و فيها اية لما يضر بالمصلحة العامة هو في ضرر اكتر من ان الراجل ميعرفش يصرف على بيته و يضطر يرتشي و يسرق علشان يربي عياله؟؟!!
الحكومة لازم تعرف انها لو بتربي غنم فلازم تعلفهم
فما بالكم بالشعب اللي محتاج ياكل و يشرب و يتعلم و يتعالج تقدم هي السبت علشان تاخد الحد
من كل قلبي بتمنى الموضوع ده يتم و ينجح و يتكرر لحد ما الست الحكومة تفوق و تصحى

تحياتي

bastokka طهقانة said...

كذبة ابريل اللي بجد بقى هي ان الحكومة حتتاثر بالاضراب ده و تعبر الشعب المسكين


بس كذبة مكشوفة حبتين

اوروفوار

Hopiz said...

انا مع رايك يا فريدة
و لتضيح رايى اكتر كنت كاتبه موضوع عن الاضراب
http://ana-we-nafsy.blogspot.com/2008/04/6.html
فكرة جيدة اننا نتجمع على فكرة
بس ما جدواها
و الغرض منها ايه؟

Professional Blog Designs by pipdig