ليس حبا في البتوع و لكن كُرها في البتوع التانين !!!






فاكرين أيام خناقة " نعم " و " لا" , انا زي عوايدي قعدت على جنب ساكتة شوية و قريت الدستور و كتبت مقال اتكلمت فيه عن السامري و بني اسرائيل؟

و طلعت النتيجة (نعم) و في ساعتها قعدت اهيس بالعامية على غير عوايدي , لأني كنت في حالة إحباط و أنا عادة لا أفضل الإحباط , انا مقاوحة بشكل مستفز , لأن ربنا عاوزني كده و لو مكنتش كده يبقى آخد شوية العلم اللي بتعلمه و أحطه على جنب و اقعد اندب كل شوية.

الكل دلوقتي بيندب , و بيعدد , شعبنا جنائزي من يومه , اهرامه مقابر و يلبس الاسود سنة و المعددة مهنة معترف بيها في قاموسه تاريخيا!

و أنا مصرية و مؤمنة جدا ببلدي , بشكل يمكن محدش يتخيله , لأني زي عوايدي وسطية شوية , لا أنا مع دول و لا مع دوكهما " على فكرة أنا مش بقول كلمة دوكهما دي في الحياة بس عاوزة اقولها دلوقت "

المهم , دول و دوكهما , و الحائر بينهما  زي حالاتي و لا يحب أن يشبع لطم في الجنازة لأن اللطم حرام أصلا , و الحرام بين و الحلال بين و ما بينهما هو الحياة يا عزيزي لو مكنش حد قالك قبل كده.

انا بقى بقولك , و طبعا هتقولي انتي مين انتي عشان تقولي و لا أسمع كلامك؟ , ما تسمعش يا عم الحاج , ما تسمعش كلام حد , مش أنا كاتبة و سوقي قوالة و نجمي يعلى مع زيادة اللي يسمع الحكاية؟! , انا  بقى بتاعة حكايات و بقولك ما تسمعش لحد , و استهدى بالله كده و اقعد رتب أولوياتك.

انت بقى عندك صوت , فالكل قاعد يلعب في دماغك , عشان تدي له اللي عندك , و معرفش ليه بيلح عليا كاريكتير فيه مواطن مصري واقف ماسك ورقة في ايده مكتوب عليها " صوت انتخابي " و بيقول " هو أنا احط البتاع ده فين يا جماعة ؟"

للأسف مش بعرف أرسم , كنت رسمت البتاع ده , و على الهامش كنت دورت علي منشأ كلمة " البتاع "
و لا على الهامش ليه ؟ ما عمو جوجل عايش ربنا يكرمه
 جوجل بيقول كلام كتير , أصلها فرعوني , معناها اللاشيء أو الشيء المنسي ......................الخ , الخ
 و انا اتلخبطت , طيب  أدور على المصدر؟

مين فينا بيدور على المصدر ؟ و النبي تقولي انت , كلمة توديك و كلمة تجيبك, " دي أغنية على فكرة بتفكرني بواحد  أعرفه بس دي قصة تانية" .

 المهم محدش بيدور على المصدر , أصلنا مش أساتذة جامعة , لازم نوثق المعلومة اللي بنقدمها , إحنا يدوب بنحاول نعرف , لكننا مش بنعرف برضه , لأن دايما الدليل " قالوا له " و في الأصل محدش شاف حاجة و عشان كده الكل متلخبط.

 انت اتلخبطت مني ؟؟

طيب نقطة و من أول السطر يا سيدي

رتب أولوياتك بجد , و ما تضيعش نفسك بالبتاع اللي في ايدك ده في حالة الإعادة
البتاع ده اسمه اختيار , حاجة كده معرفنهاش وقت طويل , عرفنا نختار لبسنا , أكلنا , شربنا ,  أزواجنا ......... الخ

الحاجات اللي يادوب تكفي غرايزنا , لكن اننا نختار , فكر , علم , سياسة ؟

 البتاع ده كنش موجود في قاموسنا

بس عمو جوجل بيقول انه موجود عند ناس تانية , و انه بقى موجود في مصر .

 و أنا بقى عارفة أولوياتي , أولوياتي بتركز دايما على اني أعرف و أحاول أعلم اللي حواليا , عشان ما يبقاش كله " بتاع" في الآخر , أنا غرامي إني أعرف , و مقاوحة و نفسي طويل , و بقول حكايات بس مش بسترزق منها , الرزق على الله .

 و العلم رزق على فكرة , رزق كلنا محتاجين ناخد منه , لأنه زي ما حرمونا من الفلوس حرمونا منه , الفلوس بتخليك تختار حاجات أنت عارف أشكالها و ألوانها , لكن العلم بيخليك تعرف ايه هو " البتاع" اللي انت مش عارفه و لا فاهمه.

وواحدة واحدة العلم ده هيكون مهم عند الكل , و سواء كسبوا دول أو دوكهما , فأنا نفسي بس شوية ناس تكون عارفة إن الأولوية لمصر ككل , حاجات معينة نركز عليها وواحدة واحدة الأمور تتحل , اللطم مش بيرجع الميت و الحي أبقى , و مش الصوات هو اللي بيثبت إنه حي , فبطل تصوت و ارحم نفسك.

عاوزني أقولك تعمل ايه ؟ عاوزني أدعو لفكر بعينه ؟ ليه ملكش دماغ تفكر بيها ؟ الثورة دي قامت ليه ؟ و انت بتختار رئيس ليه ؟ عشان خايف من اللي مش شبهك ؟ و لا عشان بقالك سنين طويلة مش بتعمل حاجة غير انك بتبني مقبرة , و لما يروح فرعون المقبرة يبقى سكرة ؟

و قاعد تولول على النتيجة ؟!!, ما تطلع زي ما تطلع .

 هو انت لسة زي ما انت حاطط النيلة على دماغك و قاعد تعدد؟  تشتم في مصر و في نفسك و اللي حواليك و خايف
خايف من ايه ؟  هي آخرتها موتة و لا أكتر ؟

عيش بقى زي ما أنت عاوز و مين ده اللي ما يعوزش يكون له كرامة و اختيار و علم ؟
مين ده اللي يقول لنفسه إنه لو ده مسك هيذله و لو التاني مسك هيضيعه ؟

لا يضيع و لا يذل ,يا مصري , صلي على نبيك , كل من مؤمن بنبي يصلي عليه
أحسن تصدق و تنقسم و يضرب كل واحد في التاني على الفاضي

انا بقولك انه الدنيا أتغيرت , و أيا كان اللي هيحصل هي أتغيرت , بس المهم انك تفهم إنها أتغيرت , لأن ساعتها هتتغير بجد .

هو حد كان يصدق إنه هيجي اليوم اللي تصوت فيه ؟ و ياما قالوا لك ده من رابع المستحيلات , بس انت عمرك ما فكرت تفهم ايه هم المستحيلات التلاته الأولى؟

و طلعوا بيضحكوا عليك يا عبيط لأن جه اليوم و صوت , بس أنت زودتها شوية , و قلت تعدد بالمرة !!!

اهدي و اقفل المندبة و فكر شوية  بهدوء , انت مش في مالطة و هي مصر و كانت خربانة و انت عاوز تصلحها وواحدة واحدة , و مفيش حاجة تخاف منها , اثبت كده و اعقل , أحسن هيسيبوك تتخانق عند المقبرة و يقسموا التركة  , الملك ملكك و كلهم بتوع , و ما هي إلا أسماء سموها و انت المالك الأصلي, بس انت مش عاوز تعرف ده , و من الجهل ما قتل.

نلتقي بعد" البتاع"



Comments

فاتيما said…
العنوان يا فريدة
تحفففففففففففففففففففففففففة
فاتيما said…
والبوست كله طبعا
:))

بس العنوان مجرم بجد
ورائع ...

Popular Posts