كل سنة و كلكم طيبين , أنا معتزلة الكتابة
لفترة , بحاول أقرأ بصراحة , أي حد بيقرأ بيعرف الحقيقة دي إن كل ما تقرأ اكتر كل
ما تكتشف أكتر انك جاهل , بس القراية عاوزة صبر ووقت و أنا عندي الأول و مش دايما عندي التاني , بس بحاول
طبعا
حكاية اني مش بكتب عاملة لي حالة عدم توازن لأن الكتابة جزء لا يتجزأ من كينونتي /"
أنت في مدونة كاتبة بالفصحى , لازم تقول كينونتي , عادي يعني! " /, في فكرة
كتاب في دماغي و رواية جديدة بس فعلا صعب أكتب قبل التحضير للكتابة, و على قد ما ده متعب ليا , بس لازم أستنى شوية.
استمتعت بدراسة التسويق الترم الأول و لو
ربنا كتب لي عمر هطبق اللي درسته بشكل جديد , إن شاء الله.
حياتي الشخصية كعادتي أحتفظ بتفاصيلها لنفسي إلا إذا كنت عاوزة أشارك لإيصال فكرة أو رأي, و كعادتها صعب تتحكي و غالبا
مستحيل تتصدق , و مزاجي مأثر عليا فبالتالي برضه ده عامل من أحد عوامل عدم
الكتابة.
2013 , هتجيب لي ايه جديد ؟ معرفش , مقدرش
أتخيل , بس كل اللي فات في حياتي بتعبه و درامته " بسلاطته و بابا غنوجه
" على رأي أحمد مكي , كله كان خير في الآخر , كعادة الله الواحد , مسبب الأشياء و خالق الكون اللي أنا مؤمنة بيه.
أيا كان اللي هتجيبه , 2013 هيكون بإذن الله
, كالعادة خير و كالعادة برضه غير متوقع بالمرة.
2012 كانت زحمة و في نصها التاني جيت أمريكا و سؤالين بتسألهم من يوم ما جيت امريكا
المصريين يسألوني " قلعتي الحجاب و لا
لسه؟ " !!
و الاجانب يسألوني " ازاي واحدة جميلة
زيك سنجل ؟"
بالنسبة للسؤال الأول , إجابته "و انت
مالك, هو على دماغي أنا و لا على دماغك انت ؟"
إجابة السؤال التاني "It's complicated "
هرجع للكتابة أول ما أقدر , أنا محتاجة
الكتابة أكتر من أي حاجة في الدنيا
الرواية حققت صدى معقول الحمد لله , بس بيني
و بينكم , لازم أكتب حاجة احسن منها , عيب أوي كده
أصلي , زي عوايدي , بقيت واحدة تانية , أنا
كل سنة واحدة معرفهاش , و ده مش تعدد شخصيات على فكرة لأن المكان و الزمان دايما
بيتغير , فالشخصية كمان بتتغير
معرفش مين أنا في 2013 , و السنة اللي فاتت
اتمنيت لكل واحد فيكم مرايا , السنة دي بتمنى لكل واحد فيكم حكاية.
و يارب تكون حكاية كويسة , أكيد هرجع ألاقي كل الناس اللي أعرفها حصل لها أحداث و أنا في البعد و حكايات تانية , بتمنى تكون خير , و بتمنى في السنة دي أرجع أكتب , دلوقت بتمنى لكم عام جديد سعيد.
و هكتب لكم حتة كتبتها لصاحبتي في رسالة ختمت بيها السنة دي بكل أحداثها :
"إنه التحرر في
أقصى صوره , عندما لا تمتلكين شيئا لتخسرينه و تعيشين و كأنك قد ملكت العالم ,
لضحكاتك صدى أسر قلب كل من سمعها.
و تلك بداية كتابة ستكتمل
فيما بعد , لأن ما لا يقتلنا يجعلنا أقوى .
الاستئناف في حد ذاته , بداية حياة.
عيشي , عيشي كأنه لا غد و اضحكي من القلب,
وأحبي إن صادفك من تميل له الروح و لا تشغلي بالك بأحد, الحياة مليئة بالحمقى و
عميان القلب , خلقوا فقط كي يعرفونك نعمة
ما وهبت من بصيرة , و تشعري بالشفقة تجاه شقائهم ,احمدي الله على كل شيء لكن لا
تفرحي بما آتاك و لا تأسي على ما فاتكِ.
إن تلك الرسالة التي أكتبها لك هي كالعادة
بداية حكاية جديدة , كتاب آخر , سنقرؤه سويا , يوما ما ,إن أراد الله , لقد كتب
الرب على نفسه الرحمة و كتب علي أنا عشق الكتابة , و ذلك الكتاب تحديدا سيكون
استثنائيا
و .............. سنرى
أحبك"
كل سنة و أنتم طيبين
أميرة الشربيني
............
No comments
Post a Comment