مدونة حكايات فريدة

خواطر ذكرى الميلاد



لو كنت أعرف و أنا في ال23 اللي عرفته في ال 32 كانت حاجات كتير اتغيرت!
 ال  31عدت
طلعت من جوايا الغضب و الحدة لأول مرة بعمري
الدنيا ضربتي و قطمت وسطي بس قالوا لي الضربة اللي مش بتقتل بتقوي و طلع عندهم حق
ال 31 علمتني الزهد لدرجة إن حتى الكتابة لم تعد هينة!
و صارت استهانتي بحاجات كثير أكبر
ال 31 عيشتني أصعب مشاعر في حياتي و أجمل مشاعر في حياتي!
حسيت بعدها إني عشت كل حاجة خلاص, و عاوزة أتخطى الإحساس ده عشان أرجع أكتب بجدية و أكمل كتابي القادم.
النهاردة 32  سنة!
كاتبة مصرية
شخصية قوية بفضل ربنا, سعيدة , عارفة هي عاوزة إيه و لله الحمد
ثرية  بمحبة ناس وجودها في حياتي نعمة و مزدحمة بمعرفة و حيوات متعددة عشتها و مشاعر مختلفة و عميقة تركت آثارها على روحي

مش بعرف أحكي , و صفحات التواصل الإجتماعي لا تُعبر عما يجري في حياتي الشخصية لكن محدش عاوز يصدق الحكاية دي فخلاص تقبلت الأمر الواقع, كل واحد حر أنا في كتابتي و المتلقي في تأويله!

اللي ممكن أقوله لك عن الحياة بعد السنين اللي فاتت
  1. خليك أقوى من اللي حواليك , محدش بيعيش حياتك ,و الناس بتورطك و في الآخر مش بتنفعك
  2. السلام النفسي جوة البني آدم و مفيش حاجة في الدنيا ممكن تهزه.
  3. فكرة إن الخبرة و الحكمة بنكتسبهم بالتجربة فكرة مش صحيحة دايما, معظم الناس اللي عرفتها اللي قرارتها غلط في حياتها كانت مقطعة السمكة و ديلها و كل الشوك وقف في زورهم و حالتهم تصعب على أي حد ,النضج إرادة و تحسين ذات ووعي, مش بالخبرة و لا تجربة كل حاجة عشان نعرف كل حاجة!
  4. بين الناس الإخلاص هو الحاجة اللي فعلا نادرة و قيمة, مش مستحيلة أبدا لكن نادرة و غالية بجد , اللي يقابل شخص مخلص في الحياة و يضيعه يبقى ملوش في الطيب أي نصيب
  5.  الخير بيجيب خير, و لو بعد وقت 
  6. الكلام سهل و الحياة صعبة , و كل واحد حر , محدش بيعيش لا سعادة و لا تعاسة حد
  7. ما تحكمش بالظاهر و تبقى بجد محترم لو ما حكمتش خالص , خليك في حالك أفيد لك و الله
  8. آمن بالرحمة تلاقيها , اكفر برحمة ربنا يطلع لك في كل خرابة عفريت!
  9.  ملحوظة أخيرة , لو تعرفني شخصيا بطل تسألني أسئلة شخصية وحياة أبوك, أنا أكيد بحبك بس فضولك بيخنقني  أنا عمري ما كنت فضولية معاك و لا بسألك غير عن اللي انت بتحكيه فاحترم ده!!, و تقبلني كما أنا لو تكرمت!)

كل سنة و أنتم طيبين و في محبة
J
3 سبتمبر 2013

5 comments

موناليزا said...

كل سنة وانتي طيبة ويارب سنواتك الجاية تكون أحلى

حسن ارابيسك said...

كلام واقعي جدا جدا
ولكن اقترب مني أكثر الجزء الأخير الخاص بالفضول وعدم سؤال من أمام عن شيئ أخر غير ما يرويه لي
تحياتي
حسن ارابيسك

Amira Elsherbiny said...

موناليزا
و انتي طيبة و بخير يا رب

:)

أشكرك

Amira Elsherbiny said...

حسن أرابيسك

تحياتي لك
و كل عام و أنت بخير

:)

يا مراكبي said...

جميلة جداً الخواطر دي
أو بمعنى أدق حكم السنين

Happy new year :-)

Professional Blog Designs by pipdig