تحية إلى نوارة

نوارة أحمد فؤاد نجم
لم تستمد شهرتها من شهرة أبيها الشاعر المصري الجميل خفيف الظل " الفاجومي" و لا من أمها الكاتبة المعروفة " صافيناز كاظم " لا .. خلقت نوارة لنفسها طريقة خاصة لكتابة اسمها
نوارة عرفت بين المدونين بمدونتها الأكثر نشاطا " جبهة التهييس الشعبية " كلنا نتابعها .. و نقرأ لها و نرى تلك الثائرة و هي تكتب و تسب و تعترض بنشاط زائد ... و حماسة لا حدود لها و أمل أردا الله له التحقق
نوارة على الساحة اليوم واحدة من ملايين المتظاهرين .. أنا شخصيا من قبل و بعد 25 يناير أتابعها و كأنها عيني في قلب الساحة
خفة دمها التي ورثتها عن أبيها و دأبها الذي جعلنا نحترمها و صدقها الذي أدخلها قلوبنا
تلك الفتاة التي كتب لها أبيها يوما قصيدة أشبه بنبوءة أو أمنية غالية لثائر لم يفقد إيمانه و انعم الله عليه بأن يعيش و يراه يتحقق.
ابنة لأب و أم ضحيا بالكثير في مقابل قول كلمة الحق و التمرد على الظلم
نوارة تكتب في اليوم الواحد أكثر من بوست .. كلهم يستحقوا القراءة لأن مدونتها نشرة أخبار متجددة .. لكن هناك بوست تحديدا شفى غليلي فيما يخص جمعة الشكر - الدعوة التي انطلقت لشكر مبارك - في مقابل جمعة الانتصار التي سيحتفل المصريون فيها غدا بنجاح ثورتهم العظيمة 
مقال نوارة كما كتبته هو التالي
  بإسلوبها المميز

الدعوة هنا للاستمرار والانتصار
احنا نازلين عشان نقول ان الثورة ما خلصتش لحد ما نحقق كل المطالب، وعشان نحتفل كمان
سمعت عن موضوع جمعة العرفان دي
عرفان وتوديع لمبارك، عشان يقولوا له شكرا
انا كمان عايزة اشكر مبارك
شكرا يا مبارك على انك خدمت البلد تلاتين سنة
شكرا لأنك دمرت الصناعة المصرية وفككت القطاع العام وبعته للمستثمرين وخربت بيوت العمال 
شكرا انك حولت المواطن المصري من مزارع وصانع لسواق توك توك
شكرا على تجريف الاراضي 
شكرا على ان السفارة المصري في اي حتة في العالم هي بالنسبة لاي مصري مهاجر او مقيم في الخارج بوابة جهنم لحد ما بقى كل الناس تستهين بينا وتسترخصنا
شكرا على انك كسرت نفس الصعايدة وقعدت عشر سنين تطحن في كرامتهم لما خليتهم مش حاسين ان البلد بلدهم وبقوا حاسين ان اهالي بحري دول قوات احتلال
شكرا على انك حاربت الارهاب.. امال، انا فاكرة كويس قوي حربك على الارهاب، لما كنت بتقتل شباب زي الورد في الشارع وياخدوا بصمات الجثث ويبتدوا التحقيق..... مع الجثث
شكرا على انك عشان تحارب الارهاب خلقت تجار مخدرات وبلطجية في الصعيد كانوا بيكسروا نفس الناس وينيموهم من المغرب
شكرا انك عشان تقسم الصعيد على نفسه خلقت فتنة طائفية وكرهت المسلمين والمسيحيين في بعض
(في بداية الحرب على الارهاب في الصعيد، الجماعات الاسلامية كانوا بيروحوا يستخبوا في بيوت المسيحيين عشان بيتناصحوا يعني على الامن، والمسيحيين زي اي صعايدة، اللي يستغيث بيهم لازم ينجدوه، فلما عرف عمل كام حاجة تقوم المسيحيين على المسلمين وتخوفهم، ومن ضمنها مثلا ان المسئول عن مذبحة الكشح ما يتحاسبش، والله اعلم بقى مين اللي عملها، اكيد هم مدام هم اللي فجروا القديسين، ومدام اللي عملها ما اتمسكش، واجبر بعض المسيحيين انهم يشتغلوا مع الامن، وخلا الامن يسرب خبر ان مسيحيين بيشتغلوا مع الامن للمسلمين وشعللها وخلاهم مش طايقين بعض، مع انه كان داخل عليهم وهم سمنة على عسل حتى مع وجود الجماعات الاسلامية)
شكرا انك بعد ما كسرت نفس الصعيد عشان تخلص على الجماعات الاسلامية قلت ان الايد البطالة نجسة ودرت على بقية مصر تكسر نفسها
شكرا على انك قعدت قوات الامن في الصعيد كل السنين دي وما فكرتش ولا ثانية ان الصعايدة لابسين الجلاليب على اللحم وانهم بياكلوا طاقة واحدة في اليوم وان فيه ايام بتعدي عليهم من غير اكل.. ما كانش يهمك، كان يهمك تكسر نفسهم وتهينهم وتخليهم يا اما يشتغلوا مع الامن يا اما يبقوا تحت رحمة تجار المخدرات والبلطجية
شكرا انك عممت التعذيب في كل قسم وفي كل مديرية امن لحد ما ظابط الشرطة المصري اقتنع تماما ان شغلته الاساسية انه يعذب الناس 
شكرا على سكان العشوائيات اللي بياكلوا من الزبالة وفضلت تكبر وتوسع فيهم واي حد يحاول يساعدهم تطفشه لانك محتاجهم في الانتخابات تشتري اصواتهم بوجبة وبطانية وشيرز 
شكرا على جوع الناس وانت عمال تكوم في سبعين مليار دولار
شكرا على انك اشتغلت خدام للامريكا وقضيت تلاتين سنة تخدم المصالح الامريكية زي ما هيلاري بتقول وتذلنا احنا
شكرا على انك فضحتنا وخليت اللي يسوى واللي ما يسواش يقول لنا يا عملاء امريكا يا عملاء اسرائيل
شكرا على اننا بنشحت القمح
شكرا على تقسيم السودان
شكرا على فضيحتنا ايام حرب غزة وبقى العالم كله بيعمل مظاهرات قدام سفارتنا زي ما بيعملوا مظاهرات قدام سفارات اسرائيل وبقت راسنا احنا البلد اللي عمرها سبعتلاف سنة واتبنت على اكتاف الفلاحين والبنائين تتساوى براس خرية عمرها ستين سنة اللي اسسها مجموعة عصابات وخارجين عن القانون
شكرا على اننا ذالين نفسنا ومصالحين اسرائيل وانت بتبعت عيالنا يموتوا في كل حتة، وتبعت عيالنا يموتوا في حرب العراق وايران وخناقة مالناش لا في تورها ولا طحينها وبعدين ترجع تبعتهم تاني يموتوا لما صدام احتل الكويت.. يوه، ينيلك يا راجل، مش انت اللي قعدت تدعم في صدام طول السنين دي؟ وتبعت العيال لافغانستان عشان تخلص منهم ولما يرجعوا تحكم عليهم بالاعدام، وتبعت بنفسك العيال للبوسنة ولما يرجعوا تعدمهم برضه، انت ما عندكش غيرنا تبعته يموت؟ واللي يرجع ما يموتش تموته بنفسك؟
ولما ما لقتش حتة تموتنا تاني فيها بقيت تبعتنا في عبارات .. اه، عبارة من اللي بيغرقوا دول
شكرا على ان اول تصريح لك عن العبارة اتريقت عليها
شكرا على انك سبت الف مصري يموتوا ما بعتش لهم توك توك وانت بتبعت طيارة انقاذ لحرائق اسرائيل
وتركب ابنك علينا ويدلدل رجليه ويجيب صحابه يتسلوا علينا ويقلبونا في الفلوس
وتعمل لنا فتنة طائفية وكل ما تحتاس تدبح لك جوز عتاقي مسيحيين وتلبس المسلمين والمسيحيين في بعض عشان تخلص منا كأن وجودنا في الحياة هو مشكلتك الوحيدة 
وتموت لنا الناس وهم خارجين في عيدهم وتدخل اللي قتلهم مجلس الشعب 
وتموت لنا الناس في ليلة راس السنة وتلبسها لبريء يموت من التعذيب 
وتدي امر بنفسك لقوات الامن انهم يفتحوا علينا الرصاص الحي
شكرا شكرا شكرا ... مش عارفة اودي العرفان والوفاء فين ولا فين
شكرا على فتح الرصاص الحي على عمال المحلة عشان عايزين عيش حاف يأكلوا بيه ولادهم وتعمل لنا علاوة الصبح وتضاعف سعر البنزين بعد الضهر
شكرا على الشاب اللي مات جنبي على كوبري قصر النيل ومنظر الدم على جسمه ووشه مش عايز يفارق عينيا 
شكرا على انك تدي القوات المسلحة امر انهم يضربوا علينا رصاص حي ولولا انهم بني ادمين ومصريين كان زمانها بقت مدبحة وكان زمان البلد راحت في داهية ومش بعيد كان جالنا احتلال عشان انت ماسك في الكرسي ومش بعيد كان الجيش ضرب في بعضه... وانت يهمك ايه؟ 
ما نولع احنا وجيشنا وناسنا واهلنا وبلدنا المهم انت وفلوسنا اللي هربتها واللي طول فترة الثورة كنت بتعمل اتصالاتك عشان تأمنها
شكرا على انك كنت بتسيبنا مذلولين مستنيين خطابك وانت قاعد على التليفون مع بن اليعازر تشكي له همك 
شكرا 
شكرا
شكرا ايها الرئيس المخلوع محمد حسني مبارك
السادة اللي عاملين الايفينت ده على الفيس بوك.. اقولكم ايه؟ اقولكم ربنا يحرق قلوبكم زي ما اهالي الشهدا اتحرقت قلوبهم عشان تحسوا بغيركم؟
صورة مبارك اتشالت، واتحط مكانها لوحة عليها لفظ الجلالة
ومش حينفع لفظ الجلالة يتشال عشان يتحط مكانه اي حد تاني
لا غالب الا الله
اما العبيد.. فخليهم في اغلالهم
رابط المقال
http://tahyyes.blogspot.com/2011/02/blog-post_16.html

رابط قصيدة نوارة بنتي بأداء أحمد فؤاد نجم
http://www.youtube.com/watch?v=yOuNSI6lGys


Comments

الفراغ said…
الف شكر لقلمك النزيه الثائر
اللى بيضايقنى فعلا اللى بيتصلوا باى مذيع ويقلولولا الراجل ده معملش شويه لمصر ويجب ان نحترمه ونقدره
وهو للاسف من موقعه مابيقدرش يرد عليها رد حاسم بس انا معاكى فى دعائك
ربنا يوجع قلبهم على حبيب علشان يحسوا باهل الشهداء وقلب كل ام اتخطف ابنها منها
بس عزائنا انه اتخطف علشان يروح الجنة باذن الله
ولك كل تحياتى وشكرا على التعريف بصاحبة مدونة جبهة التهييس الشعبيه لانى اول مره اعرفها...الف شكر
farida said…
أشكرك
و سعيدة اني عرفتك بمدونة مختلفة
لك مني تحية
KING TOOOT said…
مش غريب
إن الشرف في البلد دي
يبقى إسمه رفض
وإن شعب
يبقى باني لنفسه بيت
بين نيل و أرض
وإن طين
أي طين أسمر حزين
يبقى إسمه عرض
وكمان يا بلدي مش غريب
يرعى فيكي ألف ديب
ويبرطعوا بإسم المساجد
والكنايس والصليب
ويزرعوا الحقد إللي فارد
فوق سمانا سواد رهيب
لجل ما يبقى المصاروة
كارهين لبعض

_____________
KING TOOOT
فريدة.. انت راقية أوي أوي :). عجبني أوي عنوان البوست لأني فعلا نفسي لأقول كدة برده لنوارة. من زمـان بحترم شجاعتها أوي بس مش عرفتها بجد غير فعلا وقت الأحداث اللي فاتت، و زي ما بتقولي.. أنا فعلا كنت بستني أسمع صوتها لو كنت في البيت لأن منهـا كنت بعرف الأخبار و بتشجع و يجيلي أمل أكتر منها

شكـرا فريدة :) و شكرا نوارة... و فعلا مش شكـرا خالص للرئيس لبمخلوع غير لأنه ورانا أد إيه إحنا ناس جميلة ووقت الجد بنساعد بعض و بيبان معدننا الحقيقي. يــارب نفضل كدة
أطــيب تحياتي
farida said…
king toot

تحياتي لك
farida said…
Butterfly
شكر لك لكلماتك الجميلة

أسعدتني تحيتك و شكرك
تقبلي مني تحيتي
suzan said…
قد تكون نوارة أفكارها رائعة
لكن
اسلوبها نفس اسلوب والدها
اسلوب قلة الادب واللسان الطويل
نفسي تتعلم توصل افكارها بطريقة أكثر تهذيبا
ولا اعني البوست بتاعها اللي انتي نقلاه
انا قرأت لها العديد من المقالات التي لا ترقى ابدا لمستوى الفكرة

Popular Posts