تعرف تحترمني ؟
تعرف تسمع صوت غير صوتك؟
تعرف عشان أسمعك تكون حيادي مش تبرر غلط
فريقك و تندد بالفريق المضاد؟
عشان أنا لا معاك و لا مع الفريق المضاد
تعرف تغير طريقة تفكيرك ؟
تتحرك من خانة التحليل و الشتيمة
إلى خانة البحث عن حلول فعلية!
تعرف قبل ما تحصل المعضلة تقعد مع غيرك و
توحد الصفوف؟
بدل ما كل واحد عاوز يقنع الناس بمطلق صحة
رأيه
تعرف تبطل تدعي عليا كشعب و تشتمني و تهيني؟
عشان أنا مش ناقصك أيها المرفه اللي عندك
شاشة و شوية وقت و فضا و قاعد تحلل في وكستي
تعرف تسمعني بجد , تشوف حل يكون منطقي , مش
دايما حل ينفع تكتبه في تغريدة عشان واحد يدخل يعمل لك ريتويت! لكنه على أرض
الواقع شبه مستحيل؟
ما تعرفش؟
طيب خليك على جنب بقى , أقعد مع أصحابك اللي
تعرفهم و اللي ما تعرفهمش اشتموا و شيروا و سيبوني غرقان في دمي
أنت مش مني , و لا أنا منك , أنت منفصل عني
زي كل اللي مش عاجبينك و مبهدلهم شجب و اعتراض
اللي يشوف اللي هو عاوزه بس أسوأ من الأعمى ,
على الأقل الأعمى معليهوش حرج
لكن أنت عذرك إيه ؟ معاك شهادة و ثقافة وواقف
تكلم حيطة , هي إلكترونية صحيح , بس حيطة!
و يوم ما تعمل حاجة تعمل دعوة لنزول في
الشارع عشان بدل ما تشتم على الحيطة تضرب في الحقيقة , و أنا مش مهم و مش مهم البلد تخرب , تولع , أو أتصاب برصاصة طائشة !
أنا بالنسبة لك جاهل , متخلف , يوم ما ما
يحصلش تحليلك العميق , أبقى بالنسبة لك متنازل عن حقوقي و أستحق أسوأ حكم و مليش
حرية
أنت بتدافع عني؟
فين ؟
على صفحتك , مع أصحابك اللي اسمهم أصحابك على
صفحة سيدك "مارك" و عمرك ما قابلتهم في حياتك ,و لا بتدافع عني في اعتصام أو خناقة ؟
أنت مش قادر لسة تشوف إن خناقاتك دي آذتني
أكثر ما فادتني ؟ فتتت الأصوات و الآراء و فرقت الصفوف
مش شايف ده غباء بذمتك؟
معلش أعذرني أنا عارف إنك متعلم , كنا زمان
نقول عن المتعلم إنه متنور , بس أنت ضلمة و هم
طالما ما جلبت لي عنترية خلافاتك غير الدم ,
يبقى أعذرني لما أقولك أنت هم
تقدر تقولي مين وسط الهرج يسمع كلام؟
بس أنت لسة بتتكلم , و عمرك ما هتشوف إنك مش
حيادي لأنك غير منطقي
أنت محبوس بين حرفين هما اللام و الواو
فشلك سببه عدم حياديتك , اختلافك في كل مشكلة
, و تسيبني لغاية ما المشكلة تتفاقم و تبقى معضلة!
و بعدها تقولي إن حصل تصرفات غلط
لاااا يا شيخ !!
هو أنت ما تعرفش إن الغلط يجيب غلط ؟
و على فكرة مش اللي حواليك بس هو اللي غلط ,
أنت كمان غلطان
لكن طول ما كل همك تثبت إن أنت بس اللي صح
طول ما صوتك بيعلي في تعنيف غيرك و انتقاده و
يفضل يبرر في غلط اللي عاجبك
هنفضل كلنا ورا
كلنا في مركب واحدة , معظم ركابها على الساري
و كل جماعة يشاوروا في إتجاه
و الريح بتودينا و تجيبنا
تعرف تقولي كده بالمنطق , فين الشط؟
مش الشط اللي في خيالك ,أو اللي كان المفروض
نوصله
سيبك من المفروض, خليك في الواقع
آه نسيت , أنت منفصل عن الواقع و مبحلق في
شاشة بتجيب لك خبر
و بعد الخبر , بعد الموت تفيد بإيه كلمة لو؟!!
آه, نسيت ,هي تفيد إنك تقول " لو كنتم عملتم اللي قلت
لكم عليه ......"
طيب مش تسأل نفسك ليه دايما اللي بتقوله مش بيتحقق , مش
بيتسمع؟
لما
سنين بتعمل نفس الحاجة و ده ما وصلكش لحاجة فعلية تنهي المعضلة, و برضه ما تفكرش تغير طريقتك يبقى البعيد إيه ؟
لما الموت و الدم يكون واقع و بالرغم
من كده أنت لسه كل همك تتخانق مع اللي ضدك و تسمع موافقة اللي معاك يبقى باقي ايه؟
الفُرقة وصلتنا لإيه؟!
ما تتكلمش عني من فضلك أنت ما تعرفنيش و لا
حتى تعرف عدوك , لو تعرفه مكنش غلبك كل مرة
و غلبني معاك !
1 comment
صح
واللي إيدُه في الميَّة مش زي اللي إيدُه في النار أبداً
عمرُه ما هيحس إلا لو كان في مكانة وفي وسط ظروفُه
Post a Comment