مؤخرا توقفت عن قراءة الصحف لأني لاحظت انها ترفع الضغط و تصيب بالاكتئاب
و تشاجرت مع البــقال الذي كنت اتعامل معه لأني كنت فاكراه حرامي و بيستغل الزهيمر بتاعي
فأنا لا اتذكر أبدا سعر أي شيء
لكن كل مره يبعت لي كشف الحساب أغلى من الذي قبله
فاتخانقت مع الولد بتاع الدليفري
و رجعته بالطلبات و طردته شر طرده و لأول مره الولد يشوفني بالشكل المرعب ده ...بزعق و شويه و حشتمه هو و اللي مشغلينه " وخصوصا اني ست هاديه و مؤدبه من بتوع ميرسي و حضرتك" بس خلاص بقى كفايه كده الأدب حيخلي اللي هب و دب يستكردني لازم من وقت للتاني نوريهم العين الحمرا و قلت هو ايه استغلال!!!؟
بعديها لما عرفت الحقيقه بقيت في نص هدومي
اكتشفت ان الرجل مظلوم و ان هي دي مصر يا عبله
وإ لحق خزن بيتك لأن اللي بتشتريه النهارده بالليل بتسعه تاني يوم الصبح بيبقى باحدى عشر
و جوزي قعد يعد لي الحاجات اللي عماله تغلى كل يوم و لما خلص كلامه
بصيت له بصه زي بصة عادل امام الله يمسيه بالخير في مسرحية " شاهد ما شافش حاجه و قلت له
" انت تتوكل على الله و تشتغل رقاصه"
و بعدين نظرت حولي في غضب
لقيت الناس عادي و كأن هذا هو المتوقع
الناس غضبانه
آه
بس غضب عادي
و مفيش لا ثوره و لا أي حاجه حتحصل غير اني سارجع بكل إباء و كرامه اصالح البقال بتاعي
..
و انا مستغربه و بقول يا ترى يا هل ترى هو خلاص ما فيش فايده يا سعد يا زغلول
و مصر حتفضل مصر
و لأنها أمنا بنستحملها
لأن الواحد مش بيختار امه
و لو اني بفكر جديا في اني اتبري من امي و اللي يقربوا لي و اهج من البلد دي
و انا الحيره و الغيظ حيفرسوني لقيت عند " أحمد شقير"بوست أجاب أسألتي و حسسني ان فيه حد بيتكلم معايا
و الحوار الجميل ده كان على القهوه على دخان الشيشه
و انا استمخيت منه و عايزاكم تقروه لأني قررت أجرب الشيشه و انزل اقعد على القهوه و اتكلم في السياسه
لأني خايفه اتكلم في المدونه يتقبض عليا .. و لو انه لو اتقبض عليا حتكون فرصه كويس اشوف حد من اللي ماسكين البلد
و اسأله" هو التبس بتاع الولد بتاع الدليفري مش المفروض يغلى هو كمان و في اعتقاد سيادتك الولد يرضى بكام؟ علشان يرجع يوصل لي الطلبات؟"
11 comments
تصدقى فعلا لما بقيت انزل اشترى طلبات معدش اعرف انى هحاسب على كام
واول مرة اقول لبقال يبقى لك ربع جنيه
لا الحاجه كل يوم بتزيد
وهى فعلا نعاج وليس نجاع
تحياتى
نستاهل
والله يا فريدة الحياة بقت بجد تجيب الضغط والسكر والملح والعدس لاء بلاش العدس اصله بقى بعشرة جنيه الكيلو
حت العدس هيبقى عزيز على الشعب كان الله فى عون الغلابة وربنا يستر مش عارفين البلد دى رايحة بينا لفين
يا ستى عود احمد وحشتينا
يارب تكونى بخير
في كتير من الوقت لما بتناقش مع حد من الصحبجية انه من أخطر ما بالتنا به الاغنية الوطنية و ما اكثرها عندنا
مبدأ ماتقولش اديتنا ايه مصر قول قول هاندي اييه لمصر
ماهو لو مصر مادتنييش اللي انا عايزوه او على الاقل اللي يكفيني ك بني آدم يبقى انا كمان مش هقدر اعطيها
و عموما لما الأم او الأب بيعق حد فيهم الأبن, يبقى طبيعي جدا انه الابن يطلع عاق
فريدة: معلش.. ما معنى كلمة النجاع؟؟
الطائر الحزين
محدش بقى عارف الحساب ممكن يكون كام
انا مكنش قصدي نعاج
انا قاصده اقولها نعاج
نعج يعني أفاد
لأنه متهيء لي لو قمنا بثوره حنكون مفيدين لنفسنا و للأجيال القادمه
مش لازم نوصل للجوع علشان نثور
تحياتي
محمد عبد الغفار
يا ساتر
........
جسر الى الحياه
العدس بقى بعشره جنيه
!!!!!!!
دي معلومه جديده عليا
كان عندي شويه متخزنين لسه مخلصاهم
لا حول و لا قوة الا بالله
طب الفول و العدس كانوا يقولوا عليهم اكل الغلابه
علشان بروتين بديل للحوم
أمال الغلابه حتاكل ايه؟؟
لعلها الخير
الحمد لله انا بخير
:)
شكرا لكي
تجربتي
قول حتدينا امتى مصر ؟؟؟؟
كلمة نجاع
انا عارفه انها غريبه و مش عارفه لو كنت استخدمت الجمع صح و لا لأ
الشيء الناجع
هو الشيء المفيد
أو الصحي
انا كنت اقصد ثورة المفيدين
مش نعاج يعني خرفان "نجاع" لأنه الخرفان مش حتثور
لأنه في مقال احمد شقير كان بيقول اننا لم نصل بعض لمرحلة الجوع لأنه كله بيسرق من كله
طيب نثور من أجل التحسن من أجل أن نكون مفيدين لأنفسنا و لأولادنا
حتى لو لم نكن قد جعنا تماما بعد
لم اسمع هذه الكلمى من قبل
وبحثت
وجدت هذا المعنى
http://www.aljaafaria.com/makteba/makteba_feqeh/eslah/data/a31.html
الطائر الحزين
أحييك على الاهتمام و اشكرك عليه
قد اكون استخدمت التصريف أو الجمع الخاطيء للكلمه
الكلمه كما أعرفها في المعجم و كما كتبت ردا على " تجربتي " من قبل
الشيء الناجع
هو الشيء المفيد
أو الصحي
انا كنت اقصد ثورة المفيدين
مش نعاج يعني خرفان "نجاع" لأنه الخرفان مش حتثور
لأنه في مقال احمد شقير كان بيقول اننا لم نصل بعض لمرحلة الجوع لأنه كله بيسرق من كله
طيب نثور من أجل التحسن من أجل أن نكون مفيدين لأنفسنا و لأولادنا
حتى لو لم نكن قد جعنا تماما بعد
قد اكون استخدمت الكلمه الخاطئه
و اعتذر عن هذا كان يجب مراجعة معجمي قبل الكتابه
لكني ظننت الجمع صحيحا
تحياتي
Post a Comment