دردشة







في النصف الأول من فيلم محمد هنيدي الجديد.. تستمع كأقصى ما يكون الاستمتاع و بعد الاستراحه وللأسف يتحول الفيلم الى فيلم عربي



بجد صارت مقولة فيلم عربي فعلا شتيمه لأن الفيلم العربي أو على الأخص المصري هو الفيلم الذي يشبه كلام القهاوي...كلام كتير غير مترابط و لايؤدي لهدف واحد .. و ده لأن دايما العيب في القصه
و اللي يغيظك ان يوسف معاطي بإسمه العظيم و الفنانين اللي معاه اللي اسمهم على الأفيش ينجحه و هو لسه في العلب مش محتاج انه يخلي القصه في النهايه فيلم عربي
و بغض النظر عن القصه اللي نصها حلو و نصها عادي و شفناه 100 مره الا ان محمد هنيدي عمل مجهود جبار فعلا و هو فنان يستحق كل احترام و تحيه
تفتكروا فعلا يوسف معاطي و الناس الكبيره دي ... هي فعلا اللي بتكتب و لا بياخدوا قصص شباب مغمورين و يضيفو لها الاضافات اللي بتبوظها دي

؟؟؟؟


أصل بجد يعني اللي يكتب النص الاولاني للقصه دي مش ممكن يكتب النص التاني
أو جايز صنف الوحي كان مغشوش و لا إيه .. مش عارفه؟



.......................................................





أدخل فيلم زي ده؟؟؟؟؟؟


على جثتي بعد جثة خروف العيد

..


طبعا و لأني انسانه عميله أمريكية الهوى في الأفلام و غير منتميه للسينما السبكيه " نسبة الى السبكي" المصريه الأصيله
فأنا شفت الفيلم الاجنبي اللي مسروق منه قصة الفيلم ده

و لي عدة ملاحظات واقفه في زوري و النبي
السبكي باشا و عائلته الكريمه خنقوني خلاااص ... مصممين يعملوا افلام هابطه و تنجح علشان يثبتوا للناس المثقفه المعقده اللي زي حالاتي اللي بتقرا روايات و تستمتع بالفن الأصيل ان احنا من الحفريات و ان هو ده زمن بوحه و فرنسا و أيظن و بعرور و صبح صبح يا عم الحج
و تفضل واحده غاويه قرايه و كتابه و سينما زيي تكبر المواضيع جواها و تهلوس مع نفسها في

أثر الفن الهابط على تحضر المجتمع

و الانعكاس الانبعاجي طويل المدى من تقلص عدد الشباب القاريء

و خسارة هدر امكانيات مادية و بشريه في اعلام مشوه لا يطرح قضايا ذات قيمه



و كل ما اهلوس زياده كل ماالضغط يعلى زياده


و مش عارفه الضغط اللي سببوه لي السبكيين حيكون أثره ايه مع الكوليسترول اللي ارتفع نتيجة السماع المتكرر لأغنية فيلمهم العظيم

يا صفايح الزبده السايحه ... يا براميل القشطه النايحه


.............................................




الفنان الوطني المبجل شعبان عبد الرحيم اللي غنى " بكره اسرائيل " و" حبطل السجاير" .. ربما كانت نيته السجاير غيرالمحشوه لأنه فيما يبدو ان جرعة حشيش كبست على نفسه و اتنقل المستشفى و المتحدثون باسمه ينكرون طبعا
و انا حرام اخوض في سيرة شعبولا لأن انا ضد النميمه
لكن انا الخبر المزعوم ده لفت نظري للتفكير تاني في موضوع الحشيش
و طبعا لأن الشعب المصري العريق جدا في موضوع الحشيش ده .. يعرف ان من احد أهم طقوس العيد حشيش ليلة الوقفه
و اللي بيقرا لي من زمن يعرف اني ست نفخ و معقده حبتين و عندي حساسيه تجاه موضوع الحشيش ده
و كتبت فيه قبل كده

تحت عنوان " هل انت حشاش؟ " في مدونتي القديمه

و في ناس زعلت مني و دخلت دافعت عن نفسها باستماته

و بجد انا مش عارفه ليه انا معقده ناحية الموضوع ده قوي كده وواخداه على صدري زي ما يكون حد اعرفه حشاش مثلا ...لأن ده مش صحيح... و لو اني لا استبعد اني اكتشف ان اي حد اعرفه يكون مدمن على هذا الصنف من المخدرات

يمكن بس واحده حفريه زي ماقلنا قبل كده و بتوهم ان في علاقه بين تأخرنا و انتشار الكيف في بلدنا الجميل
بس اللي اعرفه عن الحشيش
و ايون انا اعرف عن الحشاشين و الحشيش

و محدش يسألني منين

انه على حد قول محبيه ما بيسطلش و كمان مش حرام
و بدون ان اخوض في مناقشات لن تقدم او تؤخر حول كونه حرام و لا لأ.. إلا اني مستغربه علاقة الحشيش بالعيدين
يعني الواحد يكون خارج من صيام شهر فضيل يحتفل انه يحشش
!!!!!
أو يكون في يوم اخوانه المسلمين واقفين بين يدي الله في عرفه يقوم يشاركهم وجدانيا بسيجارة حشيش

!!!!!!!
متهيء لي كده و الله أعلم انه يوم القيامه لما نقف كلنا بين يدي الله لسؤالنا سأكتشف ان الحشيش كان طقس ديني قديم و ان انا فوت على نفسي كمية حسنات رهيبه لأني لم اطلق بخوره الذكي في تلك الليالي المباركه

ما هو اصل مش معقول كل الناااس دي تكون غلط و انا الفلحوسه الوحيده اللي صح
مش عارفه اذا كان الحشيش مهم في ليالي أعياد اخواننا المسيحين!؟

ممكن ابقى أسأل في الموضوع ده

بس المهم اني اتصدمت في شعبولا لأنه وعدني على الملأ بتبطيل السجاير
و يا خوفي لأكتشف بعد كده انه عميل اسرائيلي و ان اغنيته عن اسرائيل كانت خطة خداع استراتيجيه




.....................................






أصبع عند الصحف المصريه عاده مش لطيفه.. و هي الخوض في عرض الميتين بدءا من سوزان تميم اللي كلنا و لله الحمد ضيعنا صيامنا عليها لأن الصحف المصريه كانت تخرج علينا كل يوم في أيام الشهر الفضيل بقصص جديده عن مغامراتها الجنسيه مع كبارات و بشوات البلد و العالم

و زيجاتها المتعدده .. و وزن نهديها و ردفيها السيليكونيان بالجرام بعد تشريحها

و الآن تأتي ابنه ليلى غفران وصديقتها لنقرأ قصص عنهما

و تخرج ليلى غفران على الملأ لتتناسى مصيبتها و تدافع عن عرض ابنتها بأنها كانت متزوجه بعلمها

في آيه في القرآن بتقول

" أيحب أحدكم أن يأكل لحم أخيه ميتا فكرهتموه"

و ده بالظبط اللي بيحصل

و بغض النظر عن سلوكهم و ميتتهم المريبه و الى آخره

الى ان ده فعلا اللي بيحصل

الواحد يموت الصحف تتطلع الشوك و السكاكين و بلا بينا

و اتفضلوا معانا

و الجثه تستاهل .. ما هي اللي عملت في نفسها كده .. و هي لو محترمه مكنش ربنا فضحها

!!!!!!!

.........................................................


و في النهايه بعد ما المفتش كرومبو رد لي خروفي الحبيب الضائع و قال لي انه مش شنكليح بتاع المراجيح و لا عم سنيح عضل هما اللي أخدوه و انه و لأني بلوجريه قديمه كان لازم اوجه أصابع الأتهام ناحية واحد ممن تلطخت أيديهم بآثار الكيبورد و اعرف ان ورا كل مصيبه أحد عناكب تلك الشبكه الجهنميه
فأنا سعيده ان انا و الخروف قضينا عيد سعيد
و اتمنى ان كلكم تكونوا انبسطتوا
و كل سنه و انتم طيبين

Comments

انا حره said…
ههههههههه والله انتى عسل

انا مشوفتش ولا فيلم من دول بس اكيد اكيد لو فكرت ادخل سينما عمرى ماهتجنن واروح حبيبى نائما دا لانى ببساطه البت مى عز الدين دى دمها تقيل اوى على قلبى وخصوصا لما بتعمل البت التخينه ودى وتقعد تستظرف فيها غير ان الجواب باين من اعلانه يعنى

شعبولا بقى ربنا معاه والله اعلم اذا كان فعلا محشش ولا حاجه تانيه

حمد الله على سلامه خروفك وكل سنه وانتى طيبه
أنا بجد فى غاية الانصدام -من الصدمه يعنى- من اعتبار البعض ل "يوسف معاطى" أنّه مؤلّف موهوب !! على رأى "شريف عبد الوهاب" صاحب مدوّنة "فرجه" هو "مولّف" و ليس "مؤلّف" :) يكفى جدّا أن يستطيع أى مشاهد شاهد إعلان الفيلم أن يستنتج الخط الدرامى الرئيسى فيه و كيف سينتهى النهايه السعيده دون تبرير أو توضيح أو إقناع .. الأفلام دى بتحسّسنى بكلمه كنّا بنقولها زمان و إحنا عيال بنلعب .. كلمة "كده و كده" .. ياللاّ نلعب حراميه كده و كده .. يعنى نلعب و نندمج و نعيش الدور و كل واحد فينا عارف إن التانى بيمثل و يفشر .. كثير من أفلامنا بتتعامل معنا كجمهور بطريقة "كده كده" .. تدخلى الفيلم و من قبل ما تتفرّجى تبقى مهيأه نفسيا لتقبّل أى سخافه يحملها لأنّه ببساطه فيلم كده و كده و ده اتّفاق مسبق ..

-----

حين شاهدت برومو فيلم "حبيبى نائما" و شاهدت شخصية "مى" التخينه كان تعليقى : هو عدّة التنكّر بتاعة فيلم "أيظن" فضل منها بواقى و فضل استخسروا يرموهم قالوا نستغلّهم فى فيلم تانى !! الأسخف أن مصممة المؤثرات الخاصّه تطلع فى "المصرى اليوم" و تقول لك استوردنا العدّه دى من "أمريكا" باحتياطات أمن عاليه عشان دى ممكن حد يستخدمها فى التنكّر !! نعمممممممممممممممممممممممممم .. اللىّ يسمع كده يقول إنّنا ماعرفناش "مى" و هى متنكّره أو يتخيّل أنّنا لم نشاهدها فى إعلانات "أيظن" كى ندرك أنّه نفس التنكّر السمج !! عموما ولا تزعّلى نفسك من موضوع "السبكيه" ده أهو الفيلم سقط مثله مثل كثير من أفلام العيد يعنى لسّه فيه أمل فى ذوق الناس ..
و انت طيبة يا فريدة الفريدة
بس انا مختلفة معاكي في موضوع واحد اني نفسي اشوف فيلم مي عز الدين و بحب ساعات اكون سبكية الهوى
ما هو اصل الاحباط اللي بنشوفه كل يوم في الجرايد و صفحات الحوادث لازم ليه من سيجارة سبكي تدروخنا
اما عن عم شعبان فالحشيش في وسطه رمز النزاهة و الغناوة و الجدعنة زي كباية الشاي بالنعناع عندنا كده

و ربنا ما يقطعلنا عادة

اوروفوار
فاتيما said…
حكاياتك جميلة يا فريدة
مشفتش فيلم هنيدى بس بتمنى يكون خرج من كبوته لأنه فنان خفيف الظل بجد و يبقى المضمون الهادف
أما فيلم مى فأكيد مش هشوفه و لو صدفة لأنه تقليد غبى لفيلم مميز و تريقة على البدينات بمنتهى الإبتذال
و حمدلله على سلامة الخروف
و كل عيد و إنتى طيبة
تحياتى
smraa alnil said…
ههههههههههههه وحشني اجي عندك زي زمان

بالنسبة لمحمد هنيدي فانا عامة بحبه

بس للاسف لسة مش شفت الفيلم

بالنسبة لمي

فانا اصلا بكرهها

وحتي لو الفلم عامله اجدعها مخرج عالمي برضه مش كنت هخشه

بالنسبة لشعبان

فموضوع الحشيش دة ان كان صح

فدة طبيعي جدا ليه لانه جه من بيئة الحشيش فيها زي الهوا بتاع الصبح

يعني المناطق اللي جه منها شعبان الحشيش دة بيبقي عادي جدا

وانتي جاية علي العيد

احضري اي فرح بلدي في الشارع

لازم البيرة والحشيش واللي مش ياخدوا تبقي عيبة في حق اهل العريس والعروسة وتتحاكمي
السبكيات بتجيب المراره وانا عندي قرحه بعيد عن السامعين
وهنيدي بقاله فتره بيخرف بس بيقولوا الفيلم ده كويس
انا ماشفتوش
الصحافه المصريه تتجه الي اسفل بسرعه الصاروخ ومابقاش وراهم غير مين اتجوزت وميت اتقتلت
وكرمبو لاقالك الخروف يابختك
ابقي وصيه علي فرخه تايهه من عندي بقالها يومين
هههههههههههههههههه

تحياتي ليكي
farida said…
كل سنه و انتم كلكم بخير

.................
انا حره
الله يسلمك يا حبيبتي
الخروف بيسلم عليكم
مقدرتش ادبحه
:)
....................
زمان الوصل
قلبي اطمن لما عرفت ان الفيلم سقط

مصر لسه فيها ناس بتفهم
احمدك يا رب

تحياتي
farida said…
طهقانه
أوروفوار
بقالنا كتير ما نورتيناش
كان لازم اجيب لك المفتش كرومبو يعني

لما تشوفي فيلم مي
متحكيليش عليه

انا عندي صنف سجاير تاني يعجبك

غير السبكيه اللي حترفع الضغط دي
حبعتها لك مع الخروف
بس الساطور اللي في مدونتك مخوفه

:)
farida said…
فاتيما
و انتي بخير و صحه و سعاده يا رب

تحياتي
farida said…
سمراء النيل

انتي اللي واحشاني يا عروسه
متقطعيش الزيارات

شهر العسل خلص
بس يارب العسل ما يخلصش ابدا

تحياتي
farida said…
عاشقه و غلبانه
كل عام و انتي عاشقه بس مش غلبانه
ربنا ما يجيب غلب أبدا

الفرخه لقيناها بس لقيناها عندها انفلونزا الطيور

بعتناها لشعبان عبد الرحيم في المستشفى يعالجها
و مرجعتش من يومها
يا خوفي لتكون خفت من الأنفلونزا و تعبت من اللي بالي بالك

اسألي انتصار هي معاه في حملة الفراخ دي
و سلام
عايز أقول لك
الحمد لله على السلامة واشتقتنا لكلماتك

نقدك للفيلم موضوعي

وانا شاكك في يوسف معاطي فعلا

لاني سمعت له برنامج في الراديو
معاطي شو
كان قمة في السخافة!!!!
مرحبا كيفك فريده
واضح من كلامك انك انسانه زات تفكير عميق وموضوعي بتمنالك التوفيق
انا صراحه اول مره بفوت على المدونه بتاعتك مبسوط كتير من المواضيع يلي بيه
بالنسبه للافلام بجد ببادلك الشعور بخيبة الامل من ناحيه الافلام العربيه الي صار يتضرب بيها المتل بالتفاهه
والله انا متحير كيف بيصرفو كل المبالغ الكبيره وبالنتيجه فيلم بقمة البياخه والهبل
ومتل ما قلتي في افلام القصه بتاعتها مسرقه من فيلم اجنبي متل فيلم _الحب كده_لحماده هلال ومبين في غيرها كتير بتمنى انو يتقدم بيهم التفكير ويطلعو بمجهود له قيمه
الرساله من فيلم انو يضحك الجماهير الزهقانه التعبانه شفنا الفيلم من اولو لاخرو مضحكناش بايخ سقط الفيلم مجهودهم عالفاضي ليه مفكروش بالحاجات دي من الاول معرفش
رساله من فيلم تاني يوعي الشباب ملقيوش طريقه كويسه يقدمو بيها الفيلم وبكون بدون نهايه
فيلم نهايتو مفتوحه انتو معرفتوش تسكروها ليه كمان مش عارف
صارت الافلام تجاره بس مبيعرفوش يستخدموها كويس همهم انو يجيب فلوس اعلانات وترقبو الفيلم واحنا ناطرين الحدث الرهيب وبالاخير بايخ
قصه الافلام الفاشله دي فتحتلي مواجع كتيره بس كويس ندعيلهم بالترقي والتقدم لعلهم يصلوا بيوم للفن يلي بالغرب
اما بالنسبه للحشيش ده موضوع خطير
انا خايف كتير عليكي وبالزمن ده خصوصا بالوضع الي احنا فيه لازم تجربيه مفيد للصحه وبخففلك الضغط وكمان خالي من الكروسترول وبيمنع التسوس
ايه يا حجه وفوايده كتيره كتيره بخليكي تنسي السبكي ويوسف معاطي يلي باين من اسمه انه معاطي للحشيش
وباين انك بجد متعرفيش انو من شعائر ومناسك الاعياد
متروحيش عليكي الكم الكبير من الحسنات الي انتي بحاجتها
مش عاوز اقول اكتر من كده
بالتوفيق -فريده- والى الامام
صالح
فلسطين الكئيب

Popular Posts