تقييم شخص لعلاقته بيك بعد ما بتكونوا سبتوا بعض,
وتصنيفها بيعتمد عليه هو مش على مشاعرك ناحيته مطلقا ولا حتى درجة علاقتكم
السابقة.
يعني ممكن تكون حبيت حد بجد, ومكنتش بتضيع وقت معاه, بس
علاقتكم انتهت لواحد من آلاف الأسباب اللي العلاقات بتنتهي عشانها
فأنت لأنك كنت بتحب الشخص ده, تعتبره an-ex
هو بقى عمره ما حبك واتكعبل فيك في حياته أو أنت كنت
مرحلة أو أي سبب خاص بيه لتورطه معاك خلال مرحلة في حياتكم, فبيعتبرك "معرفة/
صديق/ حد بيعزه معزة بن خالته" أو أي مسمى من المسميات الهلامية دي
أنت بقى تحب تاني وترتبط وتكون مخلص للشخص اللي أنت معاه
فتتجنب اللي انت معتبره your ex ده
بس لأن هو مش معتبر نفسه كده, عادي يتعامل عادي كأن مكنش
في ما بينكم أي شيء, ويعتبرك قليل الأصل ومعندكش ريحة الدم إنك متحفظ معاه ولما
بتقابله بتكون مش ودود كفاية
وأنت ما يكونش قصدك تهينه مطلقا بالعكس انت كنت فعلا
بتحبه وبتحترمه بس لأنك عارف ده ولأنك مخلص لعلاقتك الحالية بتتجنب شخص ف قلبك ناحيته
مشاعر.
لأن مفيش مشاعر حب بتتبخر وتتحول ل لا شيء, يا اما سبت
الشخص وأنت بتحبه, يا اما بتكرهه لأنه آذاك, وفي الحالتين دي اسمها
"مشاعر" مش مضطر مطلقا تعيشها وأنتم خلاص أنهيتم ما بينكم
أنا شخصيا بعتبر حكاية خلينا أصدقاء بعد ما كان فيه
مشاعر دي استهبال بحت, والشخص اللي ما يكونش عندك أي نوع من المشاعر ناحيته بعد
علاقة ما بينكم هو شخص عمرك ما حبيته وكنت بتضيع معاه وقت.
واللي ما تقبلوش على نفسك الأحسن إنك ما تقبلوش على
الشخص اللي معاك
بس الصراحة الرجال
ساعات بيكونوا غير الستات في الحكاية دي, يعني الراجل يتجوز واحدة, ولما يقابل
واحدة كان بينهم علاقة عادي ممكن يتكلم معاها من باب الفضول أو أي باب تاني خاص
بيه وما يعتبرش دي مشكلة
لكن تعالى بقى لراجل مراته/ خطيبته/ حبيبته كلمت واحد
كانت بتحبه ولا مخطوبة له ولا حتى متجوزاه
يا لهوييييييي!! خيانة بقى وبتردي عليه ليه؟ ما انتي لو
عاملة لي احترام! عادي تشوفي نمرته وما ترديش, تشوفيه في الشارع وتعملي نفسك مش
عارفاه
عامة أنا بتقهم غيرة الرجل لما ده بيحصل, وخصوصا لما
يكون الرجل عارف إن الست بتاعته كانت بتحب الشخص ده فعلا
وبرضه متفهمة استعباط الرجالة اللي بيعتبروا إن عادي لما
تحصل مرة بالصدفة أو من باب الفضول إنهم يكلموا واحدة كانوا معاها لأن الراجل فعلا
بيتعامل مع الست من منطلق مختلف
يعني في نوع رجل بالنسبة له الست دي "حاجة"
ولو الحاجة دي كانت في يوم من الأيام بتاعته فعادي إنه يكون فضولي تجاه مصيرها
زي عربيته القديمة اللي باعها كده, يشوفها في الشارع
ويقف جنبها يبص عليها يشوف اللي اشتراها خبطها ولا دهنها ولا عمل فيها إيه!
حاجة ملهاش علاقة لا بالحب ولا بالاهتمام, كمان في راجل
يكون هو اللي اتساب ويكون كنوع من أنواع إرضاء الغرور عاوز يعرف ال ex اللي سابته
انه صاحب تاني وإن في واحدة رضيت باللي هي ما رضيتش بيه.
معلش يا جماعة ال ego بتاع الواحد
لما بينقح عليه بيكون له آثار جانبية وعشان أكون حيادية الحكاية دي بتحصل مع ستات
كمان مش رجالة بس, عامة الواحد لما مش بيكون هو اللي سايب بيكون متأثر وكرامته
بتسبب له مشاكل.
لكن لما يكون هو اللي سايب ولسه مهتم بأخبار ال ex عادة ده بيكون فضول مش أكتر, يشوف الشخص اللي كان
يوم معاه, الدنيا أخدته لفين.؟
كل واحد له طريقة تفكيره طبعا, في رجال وستات بيعتبروا
ال ex مجرد شخص من الماضي ومش بيحرك
فيهم حاجة إن اللي معاهم يكلمهم
في رجال معندهاش أدنى مشكلة إن طليق مراته حتى يكون
بيشتغل معاها.
الأمور دي بتتوقف على الشخص وأفكاره وطريقة تقييمه
للعلاقات, وممكن ترتبط بشخص مختلف عنك بس تفضل تطبق أفكارك على نفسك على الأقل
وممكن تتحول وتكون زيه.
بس العالم كان هيكون مكان مثالي جدا لو كل واحد عزم ال ex بتاعته على
العشاء هي وحبيبها/ خطيبها/ زوجها وكانت حبيبته/خطيبته/ زوجته كمان معاه, ويقعدوا
يحكوا ذكرياتهم الحلوة والوحشة, ليه حبوا بعض وليه سابوا بعض ويكشفوا لبعض اللي
الرفيق الحالي ما يعرفوش لسه واللي ال ex اكتشفه.
والرجالة تبطل الإزدواجية الفارغة بتاعتها ودمها ما يتحرقش
لما ستاتهم يتكلموا مع ال exs بتوعهم وهم مشغلين أغنية "كيفك أنت"
لفيروز في الخلفية!
تخيلوا كده لو ده حصل! تبقى اليوتوبيا وتعيشي متصالحة مع
نفسِك وتاخدي طليقة جوزك بالحضن وتروحوا ال spa مع بعض ونعمل شوبنج مع بعض لهدايا عيد
الميلاد ونعيش كلنا مع بعض
Happily ever after!
No comments
Post a Comment